Եվրահանձնաժողովը դատարանում պարտվել է COVID-19-ի պատվաստանյութերի պայմանագրերի թափանցիկության գործով
1 րոպեի ընթերցում
ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: Եվրոպական հանձնաժողովի նախագահ Ուրսուլա ֆոն դեր Լայենը կորոնավիրուսի դեմ պատվաստանյութերի գնման պայմանագրերի թափանցիկության առնչությամբ ներկայացված գործով պարտվել է դատարանում։ Սա տեղի է ունեցել երկրորդ ժամկետով Լայենի պաշտոնավարումը շարունակելու շուրջ քվեարկության նախօրեին։
«Արմենպրես»-ի փոխանցմամբ՝ այս մասին հաղորդում է Reuters գործակալությունը։
Եվրախորհրդարանի մի շարք օրենսդիրներ խնդրել էին իրենց համար հասանելի դարձնել կորոնավիրուսի դեմ պատվաստանյութ արտադրող դեղագործական ընկերությունների հետ կնքված պայմանագրերը։ Սակայն Եվրահանձնաժողովը միայն մասնակի հասանելիություն էր տրամադրել և չէր տվել փաստաթղթերի մի մասը՝ նշելով, որ դա արվում է կոմերցիոն շահերի պաշտպանության համար։
Օրենսդիրները դիմել էին Լյուքսեմբուրգում տեղակայված Ընդհանուր իրավասության եվրոպական դատարան և հուլիսի 17-ին շահել են գործը։
Եվրահանձնաժողովը հայտարարել է, որ կուսումնասիրի դատարանի վճիռը։
Եվրոպական խորհրդարանում հուլիսի 18-ին քվեարկություն է կայանալու ֆոն դեր Լայենին երկրորդ 5-ամյա ժամկետով վերընտրելու շուրջ։