Օրբանը հանդիպել է Թրամփին

ԵՐԵՎԱՆ, 12 ՀՈՒԼԻՍԻ, ԱՐՄԵՆՊՐԵՍ։ ԱՄՆ նախկին նախագահ Դոնալդ Թրամփը հուլիսի 11-ի ուշ երեկոյան Ֆլորիդայի Մար-ա-Լագոյի իր կալվածքում ընդունել է Հունգարիայի վարչապետ Վիկտոր Օրբանին։ 

«Արմենպրես»-ի փոխանցմամբ՝ Օրբանը հանդիպումը բնութագրել է որպես «Խաղաղության առաքելություն 5․0»։

«Մենք քննարկեցինք խաղաղության հասնելու ուղիները։ Այսօրվա լավ նորությունն այն է, որ նա պատրաստվում է լուծում գտնել», - գրել է Օրբանը X սոցիալական հարթակում։ 

Մեկ այլ գրառման մեջ Օրբանը գրել է, որ շարունակել է խաղաղության առաքելությունը Մար-ա-Լագոյում։

«Նախագահ Դոնալդ Թրամփն իր պաշտոնավարման ժամանակ ապացուցեց, որ խաղաղության մարդ է։ Նա կրկին դա կանի», - հավելել է Օրբանը։

We continued the peace mission in Mar-a-Lago. President @realDonaldTrump has proved during his presidency that he is a man of peace. He will do it again! pic.twitter.com/8abVBW7f6r

— Orbán Viktor (@PM_ViktorOrban) July 12, 2024

Հունգարիայի վարչապետը հրապարակայնորեն աջակցել է Թրամփի վերընտրվելու արշավին, իսկ վերջերս ասել է, որ «շատ մեծ հավանականություն կա», որ ԱՄՆ նախագահ Ջո Բայդենը կպարտվի ընտրություններում, որոնք նշանակված են նոյեմբերի 5-ին։

Հուլիսի 5-ին Օրբանն այցելել էր Մոսկվա, որտեղ հանդիպել էր ՌԴ նախագահ Վլադիմիր Պուտինի հետ, քննարկել Ուկրաինայի հակամարտության կարգավորման հնարավոր ուղիները և խաղաղ բանակցությունների մեկնարկը։ Ավելի ուշ վարչապետն այցելել էր Պեկին, որտեղ հանդիպել էր Չինաստանի նախագահ Սի Ծինփինի հետ։ Ռուսաստան այցից առաջ Օրբանը հուլիսի 2-ին Կիևում Ուկրաինայի հակամարտության կարգավորման հարցը քննարկել էր այդ երկրի նախագահ Վոլոդիմիր Զելենսկիի հետ։ 

Օրբանի հանդիպումները մեծ քննադատության են արժանացել ԵՄ-ում։