ԱԺ-ի շենքի մոտ բախումներից տուժած քաղաքացին գտնվում է հետվիրահատական ապաքինման շրջանում
1 րոպեի ընթերցում
![ԱԺ-ի շենքի մոտ բախումներից տուժած քաղաքացին գտնվում է հետվիրահատական ապաքինման շրջանում](http://armenpress.am/resized/480/storage/images/articles/2024/07/04/GtGKLGqMY8fCZdQ9fXVF0ULzWvsafaP3zbojwU74.webp)
ԵՐԵՎԱՆ, 4 ՀՈՒԼԻՍԻ, ԱՐՄԵՆՊՐԵՍ։ Ազգային ժողովի շենքի մոտ հունիսի 12-ին ոստիկանների և ցուցարարների միջև տեղի ունեցած բախումների հետևանքով բուժհաստատությունում է գտնվում ընդամենը մեկ քաղաքացի, որի վիրահատություններն անցել են բարեհաջող, նա հիմա գտնվում է հետվիրահատական ապաքինման շրջանում։
«Արմենպրես»-ի հաղորդմամբ՝ այս մասին հայտնել է ՀՀ առողջապահության նախարար Անահիտ Ավանեսյանը՝ Կառավարության նիստից հետո լրագրողների հետ ճեպազրույցի ընթացքում։
«Ունենք ընդամենը մեկ պացիենտ, որը մի քանի վիրահատական միջամտություններ ուներ, վիրահատությունները բարեհաջող ընթացել են, և նա հիմա ապաքինման շրջանում է»,- իր խոսքում նշել է Ավանեսյանն՝ անդրադառնալով հունիսի 12-ին ԱԺ շենքի մոտ ոստիկանների և ցուցարարների միջև տեղի ունեցած բախման հետևանքով հոսպիտալացված քաղաքացիների առողջական վիճակի վերաբերյալ հարցին։
Առողջապահության նախարարը նաև նշեց, որ պացիենտը դեռ պետք է վերականգնողական ընթացք էլ անցնի, որպեսզի հնարավորինս վերականգնվի նրա ձեռքի ֆունկցիոնալությունը։