Հայաստանին պետք է ԵՄ անդամ պետությունների աջակցությունը՝ այդ ընտանիքի լիիրավ անդամ դառնալու համար․ ԱԺ նախագահ
1 րոպեի ընթերցում
ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ։ Հայաստանին պետք է Լատվիայի և ԵՄ անդամ մյուս պետությունների աջակցությունը՝ ԵՄ ընտանիքի լիիրավ անդամ դառնալու համար։ «Արմենպրես»-ի հաղորդմամբ՝ այս մասին Լատվիա կատարած այցի ժամանակ Rus.LSM-ին ասել է Ազգային ժողովի նախագահ Ալեն Սիմոնյանը։
«Այն, ինչ կատարվում է մեր տարածաշրջանում, նույն պատմությունն է, ինչ Ուկրաինայում։ Գործող անձինք պարզապես մի փոքր տարբեր են: Մեզ աջակցություն է պետք երկարաժամկետ խաղաղության համար։
Մենք տարածքային պահանջներ չունենք մեր հարևանների նկատմամբ, մեզ միայն Ադրբեջանի կառավարության ցանկությունն է պետք՝ խաղաղություն հաստատելու։ Եվ այս հարցում մեզ անհրաժեշտ է Լատվիայի և եվրոպական այլ գործընկերների օգնությունը։
Մենք կիսում ենք Լատվիայի և ԵՄ մյուս անդամ երկրների արժեքները, ուստի մեզ նրանց աջակցությունն է պետք՝ ԵՄ ընտանիքի լիիրավ անդամ դառնալու համար»,- ասել է Սիմոնյանը։
Նա հիշեցրել է,որ մի քանի օր առաջ Ազգային ժողովում քննարկվում էր ԵՄ-ին անդամակցելու հայտ ներկայացնելու հարցով հանրաքվե անցկացնելու թեման։
«Կարծում եմ, որ մի օր մոտ ապագայում մենք կունենանք այդ հանրաքվեն, և ես վստահ եմ, որ մեր ժողովուրդը կասի՝ «այո», - եզրափակել է նա։