Հանկարծամահ է եղել դերասանուհի Լալա Մնացականյանը

ԵՐԵՎԱՆ, 22 ՀՈՒՆԻՍԻ, ԱՐՄԵՆՊՐԵՍ:  Կյանքից հեռացել է սիրված դերասանուհի Լալա Մնացականյանը:

Այս մասին «Արմենպրես»-ին հայտնեց Գաբրիել Սունդուկյանի անվան ազգային ակադեմիական թատրոնի լրատվության և հասարակայնության հետ կապերի պատասխանատու Անի Ներսիսյանը:

Նրա խոսքով՝ դերասանուհին հանկարծամահ  է եղել գիշերը:

Դերասանուհու մահվան մասին հաղորդագրություն է տարածել նաև Երևանի թատրոնի և կինոյի պետական ինստիտուտը։

«Խոր ցավով տեղեկացանք, որ կյանքից անժամանակ հեռացել է Դերասանի վարպետության և ռեժիսուրայի ամբիոնի պրոֆեսոր, ՀՀ վաստակավոր արտիստ Լալա Մնացականյանը»,- նշված է ցավակցական գրառման մեջ:

 Լալա Մնացականյանը ծնվել է 1957 թվականի հոկտեմբերի 8-ին Երևանում դերասանուհու և մաթեմատիկոսի ընտանիքում։ Մայրը՝ Էլիզա Գյուլեսերյանը, եղել է բեմական խոսքի դոցենտ, հայրը՝ Բաբկեն Մնացականյանը, մաթեմատիկոս, մաթեմատիկական գիտությունների թեկնածու, դոցենտ։ Ընտանիքում եղել է երրորդ աղջիկը։ Սովորել է Երևանի համար 78 դպրոցում։ Ավարտելով այն՝ ընդունվել է Երևանի պետական գեղարվեստա-թատերական ինստիտուտի թատրոնի և կինոյի դերասանական բաժինը, որն ավարտել է 1978 թվականին կարմիր դիպլոմով։ Խաղացել է բազմաթիվ դերեր թատրոնում, կինոյում և հեռուստատեսությունում։ Հետաքրքիր դերակատարումներով հանդես է եկել տարբեր թատրոններում՝ Երևանի Երիտասարդական էքսպերիմենտալ թատրոն, Վանաձորի թատրոն, Սունդուկյանի անվան թատրոն, «Մետրո» թատրոն, Մհեր Մկրտչյան արտիստական թատրոն: 140 մանրապատումների սցենարիստ էր և դերակատար։ 1991 թվականից բեմական խոսք էր դասավանդում Երևանի կինոյի և թատրոնի պետական ինստիտուտում, բեմական խոսքի պրոֆեսոր էր։ Համահեղինակ է «Գեղարվեստական խոսքի մատուցման արվեստը» ուսումնական ձեռնարկի, որն առաջին և առայժմ միակ դասագիրքն է հայերեն: Լալա Մնացականյանը հանրության լայն շրջանակի համար սիրելի դարձավ նաև «Մեր բակը» ֆիլմերի միջոցով։