Բաղրամյան պողոտայում տեղակայված ավանը կհեռացվի․ «Տավուշը հանուն հայրենիքի» շարժումը ներկայացրեց հետագա անելիքները

ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ։ Հայ Առաքելական եկեղեցու Տավուշի թեմի առաջնորդ Բագրատ արքեպիսկոպոս Գալստանյանը Բաղրամյան պողոտայում հրավիրված հավաքի ընթացքում ամփոփեց «Տավուշը հանուն հայրենիքի» շարժման կողմից մի քանի օրերի ընթացքում իրականացված գործողությունների արդյունքները և ներկայացրեց հետագա ծրագրերը։

«Արմենպրես»-ի հաղորդմամբ՝ նա շնորհակալություն հայտնեց օրվա բոլոր գործողությունների մասնակիցներին, ովքեր արդեն մի քանի օր գտնվել են և մասնակցել են մայրաքաղաքի տարբեր վայրերում անցկացվող ակցիաներին։

«Այս 4 օրերի կամ 96 ժամյա շրջանը մենք սպառել ենք, բայց առջևում ունենք հունիսի 17-ը, որ պատգամավորական խմբակցությունները նիստ են հրավիրել, որպեսզի սկսեն այդ անվստահության գործընթացը»,- ներկայացնելով մի քանի օրվա ընթացքում տեղի ունեցած գործընթացների մասին իր մոտեցումները` նշեց Բագրատ արքեպիսկոպոս Գալստանյանը։ 

Նա հայտարարեց, որ Բաղրամյան պողոտայում տեղակայված ավանը պետք է դուրս գա, քանի որ շարժման կողմից նախանշված 96 ժամյա գործընթացն ավարտված է։

«Հունիսի 17-ին Ազգային ժողովի նիստը տեղի է ունենալու 18։30-ին։ Վաղվանից այստեղի մեր ավանը չի լինելու․ կամ այսօր գիշերվանից կամ էլ վաղն առավոտից, ինչպես հարմար է։ Այս ավանը պետք է դուրս գա»,- հայտարարեց արքեպիսկոպոս Գալստանյանը։

Նա նաև հայտնեց ներկաներին, որ գալիք մի քանի օրերի ընթացքում շարժումը պատրաստվում է տարբեր հանդիպումներ ունենալ քաղաքական ուժերի հետ։ 

«Ես ցանկանում եմ մեր այս ամբողջ շարժումը վերադասավորել, վերաձևակերպել և առաջիկա ժամանակաշրջանը դարձնել ավելի մեծ, ավելի ընդգրկուն, ավելի անգույն, ավելի չակնկալիքների մասին, և այս շարժումը հասցնել իր հաղթական ավարտին»,- ասաց արքեպիսկոպոսը՝ նշելով, որ անկախ այն հանգամանքից, թե քանի հոգի կլինեն հանրահավաքների ժամանակ, ինքը միայնակ կշարունակի պայքարը։

Նա ներկաներին տեղեկացրեց, որ շարժման հաջորդ հանրահավաքը տեղի կունենա հունիսի 17-ին՝ Ազգային ժողովում տեղի ունենալիք նիստի օրը։