ՀԱՄԱՍ-ը հայտնել է, որ Իսրայելից պատասխան չի ստացել հրադադարի մասին առաջարկի վերաբերյալ
1 րոպեի ընթերցում
![ՀԱՄԱՍ-ը հայտնել է, որ Իսրայելից պատասխան չի ստացել հրադադարի մասին առաջարկի վերաբերյալ](http://armenpress.am/resized/480/storage/images/articles/2024/06/13/k7m60dk9sN151bXt5g9HHDp1uXXjCjbDQap4WobG.webp)
ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: ՀԱՄԱՍ-ը հավանություն է տվել Գազայի հատվածում կարգավորման վերաբերյալ ԱՄՆ նախագահ Ջո Բայդենի առաջարկին, սակայն չի ստացել հաստատում, որ Իսրայելը համաձայն է դրան: «Արմենպրես»-ի փոխանցմամբ՝ այս մասին հաղորդում են մի շարք ԶԼՄ-ներ՝ վկայակոչելով շարժման նոր հայտարարությունը:
Հայտարարության մեջ ասվում է, որ ՀԱՄԱՍ-ն «անհրաժեշտ դրական վերաբերմունք է դրսևորել բանակցությունների բոլոր փուլերում»՝ հասնելու «համապարփակ և ընդունելի համաձայնության՝ հիմնված իր ժողովրդի արդար պահանջների վրա»:
ՀԱՄԱՍ-ը նշում է, որ ԱՄՆ պետքարտուղար Էնթոնի Բլինքենը «շարունակում է խոսել վերջին առաջարկության հետ Իսրայելի համաձայնության մասին. մենք չենք լսել, որ Իսրայելի պաշտոնատար անձանցից որևէ մեկը հայտարարի այդ մասին»:
Ավելի վաղ Նեթանյահուն քանիցս հայտարարել է, որ Իսրայելը չի համաձայնի մի գործարքի, որը վերջ կդնի պատերազմին, քանի դեռ ՀԱՄԱՍ-ի ղեկավարությունը և նրա ռազմական կարողությունները չեն վերացվել:
Իր հերթին ԱՄՆ պետքարտուղար Էնթոնի Բլինքենը Դոհայում հունիսի 12-ին հայտնել էր, որ ՀԱՄԱՍ-ը բազմաթիվ փոփոխություններ է առաջարկել քննարկվող առաջարկին, որոնցից մի քանիսն իրագործելի են, մի քանիսը՝ ոչ։