Նեթանյահուն ընդդիմության առաջնորդ Բենի Գանցին հորդորել է վերանայել կառավարությունը լքելու որոշումը
2 րոպեի ընթերցում
![Նեթանյահուն ընդդիմության առաջնորդ Բենի Գանցին հորդորել է վերանայել կառավարությունը լքելու որոշումը](http://armenpress.am/resized/480/static/news/b/2024/06/1139161.jpg)
ԵՐԵՎԱՆ, 10 ՀՈՒՆԻՍԻ, ԱՐՄԵՆՊՐԵՍ: Իսրայելի վարչապետ Բենիամին Նեթանյահուն ընդդիմության առաջնորդ Բենի Գանցին կոչ է արել վերանայել կառավարությունից հեռանալու իր որոշումը: «Արմենպրես»-ի փոխանցմամբ՝ այս մասին Նեթանյահուն գրել է X սոցիալական հարթակի իր էջում:
«Իսրայելը մի քանի ճակատով գոյութենաբանական պատերազմ է մղում: Բենի՛, հիմա արշավը լքելու ժամանակը չէ, հիմա ջանքերը միավորելու ժամանակն է», - գրել է նա։
Նեթանյահուն իր հայտարարության մեջ խոստացել է շարունակել պատերազմը պաղեստինյան ՀԱՄԱՍ արմատական շարժման դեմ, չնայած կենտրոնամետների առաջնորդի հեռանալուն։
«Իսրայելի քաղաքացիներ, մենք կշարունակենք այնքան, մինչև հաղթանակ տանենք և հասնենք պատերազմի բոլոր նպատակներին, առաջին հերթին՝ մեր բոլոր պատանդների ազատ արձակման և ՀԱՄԱՍ-ի վերացման», - հավելել է նա։
Իսրայելի ռազմական կաբինետի նախարար Բենի Գանցը հունիսի 9-ին հայտարարել է վարչապետի հետ տարաձայնությունների պատճառով կառավարությունը լքելու իր որոշման մասին։
«Նեթանյահուն մեզ թույլ չի տալիս դեպի հաղթանակ շարժվել Գազայի հատվածում: Ուստի ես այսօր կառավարությունից հեռանում են ծանր սրտով», - հայտարարել է Գանցը:
Նա նաև Նեթանյահուին կոչ է արել նշել ընտրությունների ստույգ ամսաթիվը, որոնք պլանավորված են 2024 թ. աշնանը։
Մայիսին Գանցը կոչ էր արել մինչև հունիսի 8-ը հաստատել Գազայի հատվածում նպատակներին հասնելու գործողությունների ծրագիրը և սպառնացել, որ հակառակ դեպքում կլքի կառավարությունը։
Ներկայիս արտակարգ կառավարությունը Նեթանյահուի կողմից ստեղծվել է 2023 թ. հոկտեմբերի 7-ին Իսրայելի վրա ՀԱՄԱՍ-ի հարձակումից հետո։ Բացի Նեթանյահուի կողմնակիցներից, այս կաբինետում տեղ են գտել մի քանի ընդդիմադիրներ, որոնցից առավել հեղինակավորը Գանցն էր։