3 րոպեի ընթերցում
ԵՐԵՎԱՆ, 9 ՀՈՒՆԻՍԻ, ԱՐՄԵՆՊՐԵՍ: ԱՄՆ և Ֆրանսիայի նախագահները վերահաստատել են Ուկրաինայի դեմ Ռուսաստանի պատերազմի վերաբերյալ իրենց վճռական դատապարտումը՝ անընդունելի համարելով Ուկրաինայի ինքնիշխան տարածքի բռնակցման փորձը՝ միջազգային իրավունքի, այդ թվում՝ ՄԱԿ-ի կանոնադրության ակնհայտ խախտումով։
«Արմենպրես»-ի հաղորդմամբ՝ այս մասին նշված է ԱՄՆ և Ֆրանսիայի նախագահների հանդիպման արդյունքներով Սպիտակ տան կայքում հրապարակված համատեղ հայտարարության մեջ:
Դրանում երկու երկրների առաջնորդներն անընդունելի և անպատասխանատու են համարել Ռուսաստանի միջուկային հռետորաբանությունն ու սպառազինությունների վերահսկման ռեժիմների անտեսումը: Այդ համատեքստում Ֆրանսիան և Միացյալ Նահանգները վերահաստատել են իրենց շարունակական աջակցությունը Ուկրաինայի ինքնիշխանության և տարածքային ամբողջականության պաշտպանությանը, այդ թվում՝ Ուկրաինային քաղաքական, անվտանգության, մարդասիրական և տնտեսական օգնության շարունակական տրամադրման միջոցով:
Միացյալ Նահանգները և Ֆրանսիան իրենց աջակցությունն են հայտնել համապարփակ, արդար և տևական խաղաղությանը, որը հարգում է միջազգային իրավունքը, և նշել, որ կշարունակեն աշխատել գործընկերների և դաշնակիցների հետ՝ համակարգելու համար աջակցության ջանքերը, որպեսզի թույլ տան Ուկրաինային ամբողջությամբ իրացնել ինքնապաշտպանության իր իրավունքը, ինչպես արտացոլված է ՄԱԿ-ի կանոնադրության 51-րդ հոդվածում։
Նախագահները քննարկել են Ուկրաինային աջակցելու համար ավելին անելու տարբերակները պատերազմում, որը, նրանց բնորոշմամբ, վտանգել է եվրատլանտյան անվտանգությունն ամբողջությամբ:
Ֆրանսիան և Միացյալ Նահանգները համանախագահում են հրետանային կոալիցիան Ուկրաինայի պաշտպանության կոնտակտային խմբում և մտադիր են նոր քայլեր ձեռնարկել՝ ընթացիկ և երկարաժամկետ հեռանկարում Ուկրաինային անհրաժեշտ աջակցություն ցուցաբերելու համար։
Ըստ հայտարարության՝ նախագահները նաև խիստ մտահոգություն են հայտնել զենքի, հատկապես Իրանից և ԿԺԴՀ-ից, ինչպես նաև Չինաստանի Ժողովրդական Հանրապետության և այլ երկրների ձեռնարկություններից ռազմական արտադրության համար կրկնակի նշանակության նյութերի և բաղադրամասերի փոխադրումների վերաբերյալ, որոնք Ռուսաստանն օգտագործում է վերակառուցելու համար ռազմական և պաշտպանական արդյունաբերական բազան՝ շարունակելու համար պատերազմն Ուկրաինայի դեմ։
Միացյալ Նահանգները և Ֆրանսիան հայտարարել են, որ հավատարիմ են մնում պատերազմի ողբերգական մարդասիրական և մարդու իրավունքների համար հետևանքների, ինչպես նաև համաշխարհային պարենային անվտանգության, էներգետիկայի, միջուկային անվտանգության և անվտանգության և շրջակա միջավայրի վրա դրանց ունեցած ազդեցության մեղմմանը: