Հարավային Կորեան մտադիր է վերսկսել հրետանային զորավարժությունները ԿԺԴՀ-ի հետ սահմանազատման գծի մերձակայքում

ԵՐԵՎԱՆ, 5 ՀՈՒՆԻՍԻ, ԱՐՄԵՆՊՐԵՍ: Հարավային Կորեան մտադիր է այս ամիս վերսկսել հրետանային զորավարժությունները Հյուսիսային Կորեայի հետ ռազմական սահմանազատման գծի և հյուսիսարևմտյան սահմանային կղզիների մերձակայքում՝ երկու երկրների միջև գործող ռազմական համաձայնագրի գործողությունը կասեցնելուց հետո։ «Արմենպրես»-ի փոխանցմամբ՝ այս մասին հաղորդում է Yonhap գործակալությունը՝ հղում անելով ռազմական գերատեսչությունում իր աղբյուրներին։

Ըստ հրապարակման՝ ծովային հետևակի կորպուսի զորքերը, որոնք տեղակայված են հյուսիսարևմտյան սահմանային կղզիներում, պլանավորում են գրեթե վեց տարվա ընթացքում առաջին անգամ անցկացնել ուսումնական գնդակոծություններ՝ օգտագործելով K-9 ինքնագնաց հաուբիցներ։

Ակնկալվում է նաև, որ բանակը կվերսկսի հրետանային վարժանքները երեք հրաձգարաններում, որոնք տեղակայված են ավելի վաղ որպես ցամաքային բուֆերային գոտի նշված շրջաններում:

Ռազմական պաշտոնյայի խոսքով՝ առաջավոր ստորաբաժանումները պատրաստ են հրետանային զորավարժություններ անցկացնել, հենց մշակվեն վարժանքների պլանները:

Հարավային Կորեայի նախագահ Յուն Սոկ Յոլը հունիսի 4-ին ստորագրել է առաջարկը, որով լիովին կասեցվել է 2018 թվականին երկու Կորեաների միջև կնքված Համապարփակ ռազմական համաձայնագրի գործողությունը՝ ի պատասխան Հյուսիսային Կորեայի կողմից 1000-ից ավելի աղբով լի փուչիկների արձակման: Այս քայլը թույլ է տալիս Հարավային Կորեային վերսկսել զորավարժություններն իր առաջնագծի պաշտպանությունն ուժեղացնելու համար:

Միջկորեական համաձայնագրով արգելված էին հրետանային և ռազմածովային զորավարժությունները, ինչպես նաև գնդերի մակարդակով դաշտային վարժանքները՝ այս շրջանում ցամաքային և ծովային բուֆերային գոտիների ստեղծման պատճառով։ Սահմանի մոտ ստեղծվել էին նաև թռիչքների համար արգելված գոտիներ՝ ինքնաթիռների պատահական բախումները կանխելու համար։