Պեկինը Վաշինգտոնին կոչ է արել չմիջամտել Չինաստանի և հարևանների միջև գոյություն ունեցող սահմանային վեճերին
1 րոպեի ընթերցում
![Պեկինը Վաշինգտոնին կոչ է արել չմիջամտել Չինաստանի և հարևանների միջև գոյություն ունեցող սահմանային վեճերին](http://armenpress.am/resized/480/static/news/b/2024/05/1138155.jpg)
ԵՐԵՎԱՆ, 28 ՄԱՅԻՍԻ, ԱՐՄԵՆՊՐԵՍ։ Չինաստանի արտաքին գործերի նախարարությունը Միացյալ Նահանգներին կոչ է արել չմիջամտել հարևանների հետ Պեկինի սահմանային վեճերին։
«Արմենպրես»-ի հաղորդմամբ՝ այս մասին հայտարարություն է տարածել Չինաստանի արտաքին գործերի նախարարության սահմանային գործերի քարտուղարության ղեկավար Հոնգ Լյանը՝ ծովային հարցերի շուրջ չին-ամերիկյան խորհրդակցությունների երկրորդ փուլի ժամանակ։
«Չինաստանը լուրջ մտահոգություն է հայտնում Չինաստանին շրջապատող ջրերում ԱՄՆ-ի ոտնձգությունների և սադրանքների կապակցությամբ և կոչ է անում Վաշինգտոնին անկեղծորեն հարգել Չինաստանի տարածքային ինքնիշխանությունը, ինչպես նաև ծովային իրավունքներն ու շահերը, չմիջամտել ՉԺՀ-ի և հարևան երկրների ծովային վեճերին», - ասել է Լյանը։
Նա նաև կոչ է արել «անհապաղ դադարեցնել Թայվանի անկախությանը կողմ հանդիսացող ուժերին աջակցությունն ու օգնությունը և կատարել «Մեկ Չինաստան» քաղաքականությանն աջակցելու ԱՄՆ-ի պարտավորությունները»:
Նշված խորհրդակցություններին ամերիկյան կողմը ներկայացրել է ԱՄՆ պետքարտուղարության՝ Չինաստանի գծով համակարգող Մարկ Լամբերտը։