Մայիսի 27-ը Խարկովում սգո օր է հայտարարվել՝ ի հիշատակ հիպերմարկետին հասցված հարվածի զոհերի
1 րոպեի ընթերցում
ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: Խարկովի քաղաքապետ Իգոր Տերեխովը մայիսի 27-ը սգո օր է հայտարարել՝ ի հիշատակ «Էպիցենտր» շինարարական հիպերմարկետին հասցված հարվածի զոհերի։ «Արմենպրես»-ի փոխանցմամբ՝ այդ մասին հաղորդում է BBC-ի ռուսական ծառայությունը:
Քաղաքում կխոնարհվեն պետական դրոշները, խանութներում, սրճարաններում և ռեստորաններում ժամանցային երաժշտություն չի հնչի։
Խարկովի դատախազությունը հաղորդում է, որ շաբաթ օրը` մայիսի 25-ին, հիպերմարկետում տեղի ունեցած պայթյունների էպիկենտրոնում գտնվել է առնվազն 20 մարդ։ Զոհվածների ստույգ թիվը դեռ պարզված չէ, սակայն հայտնի է առնվազն 14 մարդու մահվան մասին, ևս 7 հոգի համարվում է անհետ կորած։ Վիրավորվել է 44 մարդ։
Ուկրաինայի իշխանություններն ասում են, որ Ռուսաստանի զինվորականները Խարկովի հիպերմարկետին հարվածել են կառավարվող ավիառումբերով: