Տուսկը հայտնել է, որ Լեհաստանի իշխանությունները չեն ծրագրում ականապատել արևելյան սահմանը

1 րոպեի ընթերցում

ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ։ Լեհաստանի իշխանությունները չեն ծրագրում հրաժարվել Օտտավայի կոնվենցիայից, որն արգելում է հակահետևակային ականների օգտագործումը, կուտակումն ու արտադրությունը։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին մամուլի ասուլիսի ժամանակ հայտարարել է Լեհաստանի վարչապետ Դոնալդ Տուսկը։

«Մենք ականապատում չենք ծրագրում»,- ասել է նա՝ հավելելով, որ տվյալ ոլորտում միջազգային իրավունքը փոխելու ծրագրեր չկան։

Նրա խոսքով, արևելյան սահմանի ծրագրված ուժեղացումը կոչված է զսպելու պոտենցիալ թշնամուն: «Մենք երաշխավորում ենք, որ Լեհաստանի արևելյան սահմանը կլինի ամենաարդիական հսկվող սահմանը Եվրոպայում, մենք դա կանենք հիմնականում եվրոպական փողերով», - ասել է Տուսկը:

Նախօրեին Լեհաստանի նախկին վարչապետ Մատեուշ Մորավիցկին կոչ էր արել հանրապետության իշխանություններին հրաժարվել Օտտավայի կոնվենցիայից՝ Ռուսաստանի Դաշնության Կալինինգրադի մարզի, Բելառուսի հետ սահմանը և ավելի հարավում գտնվող սահմանն արդյունավետ պաշտպանելու համար:

Բաժանորդագրվեք մեր ալիքին Telegram-ում