2 րոպեի ընթերցում
ԵՐԵՎԱՆ, 17 ՄԱՅԻՍԻ, ԱՐՄԵՆՊՐԵՍ:Սերգեյ Փարաջանովի թանգարանը ռեժիսորի 100-ամյա տարեդարձը շարունակում է տոնել հետաքրքիր միջոցառումներով: Առաջիկայում նախատեսվում են նոր ցուցադրություններ, համերգային ծրագիր:
«Արմենպրես»-ի հաղորդմամբ՝ «Թանգարանային գիշեր»-ին նվիրված հանդիպմանը, որը տեղի ունեցավ մայիսի 17-ին, Փարաջանովի թանգարանի տնօրեն Անահիտ Միքայելյանը հիշեցրեց՝ հոբելյանին նվիրված միջոցառումները մեկնարկել են Փարաջանովի ծննդյան օրը՝ հունվարի 9-ին:
«Փարաջանովի հոբելյանը ներառված է ՅՈՒՆԵՍԿՕ-ի Հռչակավոր մարդկանց և կարևոր իրադարձությունների հոբելյանների 2024-2025 թվականների օրացույցում: Մենք պատիվ ունեցանք ՅՈՒՆԵՍԿՕ-ի կենտրոնական գրասենյակում ապրիլի սկզբին բացել լուսանկարչական ցուցահանդես, ներկայացված էր նաև Հայաստանի ազգային կինոկենտրոնը, որը ցուցադրեց «Նռան գույնը»: Փարաջանովի երկրպագուները հնարավորություն ունեցան դիտելու ֆիլմից բաց թողնված կադրերը»,-պատմեց նա:
Թանգարանն աշնանը Հայաստանի ազգային պատկերասրահում նախատեսում է ցուցահանդես կազմակերպել՝ կազմված Սերգեյ Փարաջանովի այն ստեղծագործություններից, որոնք մասնավոր հավաքածուներում են:
«Լինելու է մեծ գիտաժողով՝ նվիրված մեծանուն արվեստագետի ֆիլմարվեստին, գործունեությանը: Գիտաժողովին մարդիկ Փարաջանովին կճանաչեն տարբեր տեսանկյուններից: Նախատեսվում է Հայաստանի ազգային ֆիլհարմոնիկ նվագախմբի և Իգիթյանի անվան կենտրոնի հետ համատեղ համերգ-ներկայացում, բալետային ներկայացում՝ նվիրված ռեժիսորին»,-ընդգծեց Անահիտ Միքայելյանը:
Խոսելով «Թանգարանային գիշեր»-ի շրջանակում կազմակերպված միջոցառումների մասին՝ նա տեղեկացրեց՝ համագործակցելու են Նորաձևության և դիզային պալատի հետ, յուրահատուկ ցուցադրության են ներկայացնելու: Ըստ տնօրենի՝ դիտելով ցուցադրությունը՝ այցելուները կտեսնեն, թե ինչ ազդեցություն կարող է ունենալ ռեժիսոր-արվեստագետը նորաձևության վրա: