Թուրքիայի և Վրաստանի միջև ստորագրվել է էներգետիկայի ոլորտում համագործակցության փոխըմբռնման հուշագիր
1 րոպեի ընթերցում
ԵՐԵՎԱՆ, 17 ՄԱՅԻՍԻ, ԱՐՄԵՆՊՐԵՍ: Թուրքիայի նախագահ Ռեջեփ Թայիփ Էրդողանի և Վրաստանի վարչապետ Իրակլի Կոբախիձեի ներկայությամբ երկու երկրների միջև ստորագրվել է էներգետիկայի ոլորտում համագործակցության փաստաթուղթ:
Ինչպես հաղորդում է «Արմենպրես»-ը, այս մասին հայտնում է թուրքական «Անադոլու» լրատվական գործակալությունը:
Թուրքիայի նախագահի և Վրաստանի վարչապետի՝ Անկարայում դեմ առ դեմ և ընդլայնված կազմերով բանակցություններից հետո երկրների ղեկավարների ներկայությամբ Թուրքիայի Հանրապետության էներգետիկայի և բնական պաշարների նախարարության և Վրաստանի էկոնոմիկայի և կայուն զարգացման նախարարության միջև ստորագրվել է «Էներգետիկայի ոլորտում համագործակցության մասին փոխըմբռնման հուշագիր»։
Թուրքիայի անունից հուշագիրը ստորագրել է էներգետիկայի և բնական պաշարների նախարար Ալփարսլան Բայրաքթարը, իսկ Վրաստանի անունից՝ փոխվարչապետ, էկոնոմիկայի և կայուն զարգացման նախարար Լևան Դավիթաշվիլին։