2 րոպեի ընթերցում
ԵՐԵՎԱՆ, 8 ՄԱՅԻՍԻ, ԱՐՄԵՆՊՐԵՍ: Լիտվայի կառավարությունը խորհրդարանից թույլտվություն է ստացել վարժական նպատակով Ուկրաինա զորքեր ուղարկելու համար: «Արմենպրես»-ի փոխանցմամբ՝ այս մասին հաղորդում է Financial Times թերթը՝ հղում անելով բալթյան հանրապետության վարչապետ Ինգրիդա Շիմոնիտեին։
Միևնույն ժամանակ, ինչպես հաղորդում է հրատարակությունը, Լիտվայի կառավարության ղեկավարը նշել է, որ Կիևի կողմից դրա վերաբերյալ որևէ խնդրանք չի եղել։
«Եթե հաշվի առնենք Ռուսաստանի արձագանքը, ապա մենք ոչինչ չենք կարող ուղարկել», - ասել է Շիմոնիտեն։
Ֆրանսիայի նախագահ Էմանուել Մակրոնը փետրվարին հայտնել էր, որ արևմտյան շուրջ 20 պետությունների ներկայացուցիչների մասնակցությամբ Փարիզում կայացած հանդիպմանը բարձրացվել է Ուկրաինա ցամաքային զորքերի հնարավոր ուղարկման թեման։ Նրա խոսքով` մասնակիցներն այս հարցի շուրջ փոխհամաձայնության չեն եկել, սակայն նման սցենարն ապագայում բացառել չի կարելի։ Մակրոնի հայտարարությունից հետո մի շարք երկրներ, ինչպես նաև ՆԱՏՕ-ն բացառել էին Ուկրաինա զորքեր ուղարկելու հնարավորությունը։
Ռուսաստանի արտաքին հետախուզական ծառայության ղեկավար Սերգեյ Նարիշկինը մարտի 19-ին հայտարարել է, որ Ֆրանսիան արդեն զորակազմ է պատրաստում Ուկրաինա ուղարկելու համար։