2 րոպեի ընթերցում
ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: Ամերիկյան Պուլիցերյան մրցանակի կազմկոմիտեն մայիսի 6-ին Նյու Յորքի Կոլումբիայի համալսարանում (Columbia University) հայտարարել է դափնեկիրներին, հաղորդում է «Արմենպրես»-ը:
«Հասարակությանը ծառայելու համար» անվանակարգում հաղթել է Նյու Յորքում հաստատված, լրագրողական հետաքննությամբ զբաղվող ProPublica ոչ առևտրային կազմակերպությունը՝ «նորարարական և հավակնոտ ռեպորտաժի համար, որը ճեղքել է Գերագույն դատարանի շուրջ գաղտնիության հաստ պատը»։
«Լրագրողական հետաքննություն» անվանակարգում հաղթող է ճանաչվել The New York Times-ից լրագրող Հաննա Դրայերը`ողջ Միացյալ Նահանգների տարածքում միգրանտ երեխաների աշխատանքի ցնցող մասշտաբների մասին մի շարք ռեպորտաժների համար:
Reuters գործակալության լրագրողները և The Washington Post-ի աշխատակիցները մրցանակ են ստացել «Ազգային լրագրություն» անվանակարգում:
Reuters գործակալությունը մրցանակի է արժանացել նաև «Հրատապ լուրերի լուսանկարչություն» անվանակարգում։
The New York Times-ի լրագրողները հաղթել են «Արտասահմանյան լրագրություն» անվանակարգում՝ «հոկտեմբերի 7-ին Իսրայելի հարավում ՀԱՄԱՍ-ի մահաբեր գրոհը, իսրայելական հետախուզության ձախողումները և Գազայում իսրայելցի զինվորականների մասշտաբային մահացու պատասխանը լայնորեն ու բացահայտ լուսաբանելու համար»:
Իսկ Ռուսաստանի Դաշնությունում օտարերկրյա գործակալ ճանաչված լրագրող Վլադիմիր Կարա-Մուրզան հաղթանակի է արժանացել «Մեկնաբանություններ» անվանակարգում։
Պուլիցերյան մրցանակն ամեն տարի հանձնվում է Նյու Յորքում, այս տարի հաղթողներին հայտարարել են 108-րդ անգամ։