Երևանի Նոր Արեշի 50-րդ և հարակից փողոցներում շարունակվում են մաքրման աշխատանքները
1 րոպեի ընթերցում
![Երևանի Նոր Արեշի 50-րդ և հարակից փողոցներում շարունակվում են մաքրման աշխատանքները](http://armenpress.am/resized/480/static/news/b/2024/05/1136465.jpg)
ԵՐԵՎԱՆ, 6 ՄԱՅԻՍԻ, ԱՐՄԵՆՊՐԵՍ: Օրերս Երևանի Նոր Արեշ 50-րդ փողոցի շենքերից մեկի մոտակայքում Ողջաբերդ գետի մակարդակի բարձրացման հետևանքով փլուզվել էր հենապատը։ Ջրալցվել էին հարակից փողոցները և բնակելի տները:
Ինչպես «Արմենպրես»-ին տեղեկացրին Երևանի քաղաքապետարանից, այժմ գետի հունի վերականգնումից հետո համայնքային կառույցների ու վարչական շրջանի համատեղ ուժերով իրականացվում են տարածքի մաքրման աշխատանքներ:
Ըստ աղբյուրի՝ ժամանակավոր հենապատի կառուցման, ջրանցքի հունի և փողոցների մաքրման աշխատանքներում ներգրավված են նաև «Երևանի աղբահանություն և սանիտարական մաքրում» հիմնարկի աշխատակիցներն ու տեխնիկական միջոցները։
Նշվում է, որ Նոր Արեշի 50-րդ և հարակից փողոցներում աշխատանքները շարունակվում են: