387.85
2 րոպեի ընթերցում
ԵՐԵՎԱՆ, 2 ՕԳՈՍՏՈՍԻ, ԱՐՄԵՆՊՐԵՍ։ Մայրաքաղաքում 2024 թվականին կփոխարինվի 500 վերելակ: «Արմենպրես»-ի փոխանցմամբ՝ այս մասին հայտնում են Երևանի քաղաքապետարանից, նշելով, որ գործընթացն իրականացվում է երկու փուլով:
«Հասցեներն ընտրվել են՝ հաշվի առնելով վերելակների մաշվածությունը: Քաղաքի բազմաբնակարան շենքերի վերելակների մեծ մասը ավելի քան 4 տասնամյակ սպասարկում են բնակիչներին:
Երևանի քաղաքապետարանը վեցերորդ տարին անընդմեջ իրականացնում է վերելակների փոխարինման ծրագիրը: 2019 թվականից սկսած, այս տարին էլ ներառյալ, քաղաքում կունենանք փոխարինված 2051 վերելակ: Սրանով կարող ենք արձանագրել, որ քաղաքի վերելակային ֆոնդի գրեթե կեսը փոխարինել ենք: Հաշվի առնելով, որ վերելակները բաժնային սեփականություն են, ծրագիրն իրականացնում ենք՝ թեթևացնելով բնակիչների սոցիալական բեռն ու ապահովելու քաղաքացիների անվտանգությունը»,- ընդգծել է Երևանի քաղաքապետի տեղակալ Լևոն Հովհաննիսյանը:
Երևանի քաղաքապետարանի կոմունալ տնտեսության վարչության պետ Կամո Բադանյանն ընդգծել է, որ այս պահին միանգամից 97 հասցեներում սկսվել է փոխարինումը: Տեղադրվում են 400 հատ բելառուսական ու 100 ռուսաստանյան արտադրության սարքավորումներ: Շահագործման ժամկետը մոտ 25 տարի է
Ամեն մի վերելակի փոխարինման համար սահմանված է 40 աշխատանքային օր: Նախքան շահագործվելը՝ յուրաքանչյուր վերելակ հատուկ փորձաքննության է ենթարկելու: Շեշտվում է, որ դրանք հարմարեցված կլինեն նաև հաշմանդամություն ունեցող անձանց համար:
«Քաղաքացիների խնդիրը վերելակները խնամքով օգտագործելն ու պահպանելն է, քանի որ դրանք իրենց իսկ պատկանող բաժնային սեփականությունն են»,- նշված է հաղորդագրության մեջ: