Տյումենի մարզում ավելի քան 6500 բնակիչ է տարհանվել հեղեղումների պատճառով

ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: Ռուսաստանի Տյումենի մարզում հեղեղումների պատճառով տարհանված բնակիչների թիվն աճում է։ Այդ մասին «Արմենպրես»-ը տեղեկանում է «Ինտերֆաքս» գործակալությունից:

Ռուսաստանի արտակարգ իրավիճակների նախարարության տվյալներով՝ մայիսի 3-ի դրությամբ հեղեղումների գոտիներից տարհանվել է տարածաշրջանի ավելի քան 6500 բնակիչ։

43 բնակավայրերում ջրածածկ է մնում 361 շենք, 523 ամառանոց, 3169 տնամերձ հողատարածք և ավտոճանապարհների 30 հատված, ընդգծվում է հաղորդագրության մեջ։

Մայիսի 2-ի տվյալներով՝ Տյումենի մարզում հեղեղումների գոտիներից տարհանվել էր 6000 մարդ։

Հեղեղումների սպառնալիքի պատճառով ապրիլի 8-ից տարածաշրջանում արտակարգ դրության ռեժիմ է գործում։