Օսթինը պահանջել է Ռաֆահից տարհանել խաղաղ բնակչությանը` քաղաքի վրա հարձակման դեպքում

ԵՐԵՎԱՆ, 2 ՄԱՅԻՍԻ, ԱՐՄԵՆՊՐԵՍ: ԱՄՆ պաշտպանության նախարար Լլոյդ Օսթինն Իսրայելի պաշտպանության նախարար Յոավ Գալանտի հետ հեռախոսազրույցում քննարկել է պատանդների վերադարձի շուրջ շարունակվող բանակցությունները, Գազայի հատվածի բնակչությանը մարդասիրական օգնության տրամադրումը և իրադրությունը Գազայի հատվածի Ռաֆահ հարավային քաղաքում: «Արմենպրես»-ի փոխանցմամբ՝ այս մասին հաղորդել է Պենտագոնը:

Օսթինն ընդգծել է, որ Ռաֆահում Իսրայելի ցանկացած հնարավոր ռազմական գործողություն «պետք է ներառի պաղեստինցի քաղաքացիական բնակչության տարհանման և մարդասիրական օգնության շարունակական հոսքի հուսալի պլան»:

Ըստ Պենտագոնի հաղորդագրության՝ ԱՄՆ պաշտպանության նախարարը նաև վերահաստատել է Վաշինգտոնի հանձնառությունը պաղեստինյան ՀԱՄԱՍ արմատական շարժման կողմից Գազայում պահվող «բոլոր պատանդների անվերապահ վերադարձին» և նշել հումանիտար օգնության հոսքը դեպի Գազայի հատված մեծացնելու կարևորությունը՝ «դրա հետ մեկտեղ ապահովելով քաղաքացիական անձանց և հումանիտար աշխատողների անվտանգությունը»:

Միևնույն ժամանակ, ինչպես հաղորդել է The Times of Israel թերթը, ԱՄՆ Ներկայացուցիչների պալատի 212 դեմոկրատներից 57-ը նամակ են ստորագրել՝ կոչ անելով նախագահ Ջո Բայդենի վարչակազմին ձեռնարկել բոլոր հնարավոր միջոցները Իսրայելի առաջխաղացումը դեպի Ռաֆահ կանխելու համար: