1 րոպեի ընթերցում
ԵՐԵՎԱՆ, 30 ԱՊՐԻԼԻ, ԱՐՄԵՆՊՐԵՍ։ Ուկրաինան դուրս է եկել ԱՊՀ անդամ երկրների հետ հանրային առողջապահության ոլորտում համագործակցության համաձայնագրից։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է Գերագույն Ռադայում երկրի Նախարարների կաբինետի ներկայացուցիչ Տարաս Մելնիչուկը։
«Ուկրաինան դուրս է եկել հանրային առողջապահության ոլորտում համագործակցության համաձայնագրից, որը ստորագրվել է 1992 թվականի հունիսի 26-ին Մինսկում»,- գրել է Մելնիչուկը։
Նրա խոսքով՝ Ուկրաինան նմանապես դուրս է եկել 2003 թվականի սեպտեմբերի 18-ին Յալթայում և 2005 թվականի նոյեմբերի 25-ին Մոսկվայում ստորագրված փոփոխությունների և լրացումների մասին արձանագրություններից՝ նշված համաձայնագրի շրջանակում։