Չարլզ 3-րդը քաղցկեղի ախտորոշումից հետո վերադարձել է հանրային պարտականությունների կատարմանը

ԵՐԵՎԱՆ, 30 ԱՊՐԻԼԻ, ԱՐՄԵՆՊՐԵՍ: Մեծ Բրիտանիայի թագավոր Չարլզ 3-րդն ապրիլի 30-ին առաջին անգամ վերադարձել է հանրային ​​պարտականությունների կատարմանը՝ նրա մոտ քաղցկեղի ախտորոշումից հետո։ «Արմենպրես»-ի փոխանցմամբ՝ այս մասին հաղորդում է Sky News-ը։

Ըստ հրապարակման՝ Բրիտանիայի թագավորն այցելել է Լոնդոնի ուռուցքաբանության կենտրոն, որտեղ հանդիպել է բժիշկների ու հիվանդների հետ:

«Նորին մեծության բուժման պլանը կշարունակվի, բայց բժիշկները բավականաչափ գոհ են առաջընթացից, ուստի թագավորը կարող է վերսկսել առանձին հանրային պարտականությունների կատարումը», - ասվում է Բուքինգհեմյան պալատի հայտարարության մեջ:

Չարլզ 3-րդը հանդիպել է ոչ միայն քաղցկեղով հիվանդների ու նրանց հարազատների, այլև TRACERx նախագծի թիմի անդամների հետ, որոնք զբաղվում են թոքերի քաղցկեղի հետազոտությամբ։

Բրիտանիայի միապետն իր մոտ քաղցկեղի ախտորոշման մասին հայտնել էր այս տարվա փետրվարին:

Չառլզ 3-րդը նաև դարձել է Cancer Research UK բարեգործական կազմակերպության հովանավորը: Այս պարտականությունը նա ընդունել է իր մորից՝ հանգուցյալ Եղիսաբեթ 2-րդից, որն ավելի վաղ եղել է կազմակերպության հովանավորը։