Հնդկաստանում մեկնարկել է աշխարհի ամենամասշտաբային ընտրությունների երկրորդ փուլը

ԵՐԵՎԱՆ, 26 ԱՊՐԻԼԻ, ԱՐՄԵՆՊՐԵՍ։ Հնդկաստանում մեկնարկել է խորհրդարանական ընտրությունների 7 փուլերից երկրորդը։ Սա համարվում է աշխարհի ամենամասշտաբային ընտրություններից մեկը։ Երկրորդ փուլի ընթացքում՝ ապրիլի 26-ին, քվեարկությանը կարող է մասնակցել շուրջ 106 միլիոն ընտրող։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։

Երկիրն ընտրում է խորհրդարանի ստորին պալատի՝ Լոկ Սաբհայի պատգամավորներին։ Ընտրությունների արդյունքները հայտնի կդառնան հունիսի 4-ին։

Խորհրդարանական ընտրությունների առաջին փուլում Հնդկաստանի 21 նահանգներում և տարածքներում քվեարկել է ավելի քան 100 միլիոն մարդ։

Հնդկաստանի վարչապետ Նարենդրա Մոդին պայքարում է երրորդ ժամկետով ընտրվելու համար։ Նրա «Հնդկաստանի ժողովրդական կուսակցությունը» (BJP – Bharatiya Janata Party) կուսակցությունը և ընդդիմադիր «Կոնգրես» կուսակցությունը երկուսն էլ խոստացել են աշխատատեղեր ստեղծել երկրում, սակայն այդ նպատակին հասնելու, ինչպես նաև պետական ծախսերի նրանց տեսլականները տարբերվում են։