Վրաստանում 4 մարդ է ձերբակալվել Եվրոպայի գրադարաններից 18-19-րդ դարերի գրքերի գողության առնչությամբ
1 րոպեի ընթերցում
ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: Վրաստանում ձերբակալվել են կազմակերպված հանցավոր խմբավորման չորս անդամներ, որոնք 18-19-րդ դարերի հարյուրավոր գրքեր են գողացել Եվրոպայի գրադարաններից։ Այս մասին «Արմենպրես»-ը տեղեկանում է Sputnik գործակալության վրացական ծառայությունից:
Ըստ Վրաստանի գլխավոր դատախազության՝ երկրի քաղաքացիներն ստեղծել են կազմակերպված խմբավորում, որը բնօրինակ գրքեր է գողացել Ֆրանսիայի, Գերմանիայի, Լիտվայի, Լատվիայի, Էստոնիայի, Շվեյցարիայի, Լեհաստանի և Չեխիայի ազգային և համալսարանական գրադարաններից և դրանք փոխարինել կեղծերով։
Գլխավոր դատախազության տվյալներով՝ խոսքը հարյուրավոր գրքերի մասին է։ Գողացված 19-րդ դարի ֆրանսերեն գրքերից մեկը քննչական միջոցառումների արդյունքում հայտնաբերվել է Վրաստանում։
Ձերբակալվածներին սպառնում է 6-ից մինչև 10 տարվա ազատազրկում: