Լեհաստանի նախագահը դեմ չէ երկրում ՆԱՏՕ-ի միջուկային զենքի տեղակայմանը

ԵՐԵՎԱՆ, 22 ԱՊՐԻԼԻ, ԱՐՄԵՆՊՐԵՍ: Լեհաստանի նախագահ Անջեյ Դուդան հայտարարել է, որ պատրաստ է միջուկային զենք տեղակայել երկրի տարածքում։ «Արմենպրես»-ի փոխանցմամբ՝ այս մասին նա ասել է Fakt հրատարակությանը տված հարցազրույցում։

«Եթե մեր դաշնակիցները որոշեն միջուկային զենքի համատեղ օգտագործման շրջանակներում միջուկային զենք տեղակայել նաև մեր տարածքում՝ ՆԱՏՕ-ի արևելյան թևի անվտանգությունն ամրապնդելու նպատակով, ապա մենք պատրաստ ենք դրան», - հայտարարել է Դուդան։

Նա հավելել է, որ Լեհաստանը դաշնակից է Հյուսիսատլանտյան դաշինքում և նույնպես պարտավորություններ ունի այդ առումով։

«Մենք պարզապես ընդհանուր քաղաքականություն ենք իրականացնում», - նշել է Դուդան։

Լեհաստանի նախագահը նաև ասել է, որ երկրում ամերիկյան միջուկային զենքի տեղակայման թեման «արդեն երկար ժամանակ լեհ-ամերիկյան բանակցությունների թեմաներից է»։