1 րոպեի ընթերցում
ԵՐԵՎԱՆ, 20 ԱՊՐԻԼԻ, ԱՐՄԵՆՊՐԵՍ։ Պաղեստինի ինքնավարությունը կվերանայի ԱՄՆ-ի հետ երկկողմ հարաբերությունները՝ կապված Պաղեստինին ՄԱԿ-ի կազմ ընդունելու բանաձևի վրա վետո դնելու հետ։
Ինչպես տեղեկացնում է «Արմենպրես»-ը, այդ մասին հայտարարել է պաղեստինցիների առաջնորդ Մահմուդ Աբասը։
Միացյալ Նահանգները վետո է դրել Ալժիրի ներկայացրած բանաձևի վրա, որը խորհուրդ էր տալիս Գլխավոր ասամբլեային Պաղեստինն ընդունել ՄԱԿ-ի կազմ: Մեծ Բրիտանիան և Շվեյցարիան ձեռնպահ են մնացել քվեարկությունից։ ՄԱԿ-ի Անվտանգության խորհրդի մնացած անդամները կողմ են քվեարկել։
Աբասը ԱՄՆ-ի վետոն անվանել է հիասթափեցնող, անպատասխանատու և աններելի:
«Պաղեստինի ղեկավարությունը կվերանայի ԱՄՆ-ի հետ երկկողմ հարաբերությունները, որպեսզի համոզվի, որ մեր ժողովրդի շահերը, մեր գործը և մեր իրավունքները պաշտպանված են»,- ասել է Պաղեստինի առաջնորդը։