ԱՄԷ-ն կարծում է, որ Պաղեստինի անդամակցությունը ՄԱԿ-ին կնպաստի տարածաշրջանում խաղաղ գործընթացին
1 րոպեի ընթերցում
ԵՐԵՎԱՆ, 20 ԱՊՐԻԼԻ, ԱՐՄԵՆՊՐԵՍ: Արաբական Միացյալ Էմիրությունները ափսոսանք է հայտնել, որ ՄԱԿ-ի Անվտանգության խորհուրդը չի կարողացել Պաղեստինին համաշխարհային կազմակերպության լիիրավ անդամ ճանաչելու մասին բանաձև ընդունել։
Ինչպես հաղորդում է «Արմենպրես»-ը, այս մասին հայտնել է WAM գործակալությունը:
ԱՄԷ-ի պետնախարար Խալիֆա Շահեն Ալ-Մարարի խոսքով՝ Պաղեստինին ՄԱԿ-ին լիիրավ անդամակցություն տալը կարևոր քայլ կլինի տարածաշրջանում խաղաղությանն ուղղված ջանքերն ակտիվացնելու համար:
Պետնախարարն ընդգծել է, որ առանց Պաղեստինի անկախ և ինքնիշխան պետության ստեղծման անհնար է տարածաշրջանում հասնել կայուն և արդար խաղաղության, ինչպես նաև ապահովել Իսրայելի անվտանգությունը։
Ապրիլի 18-ին Միացյալ Նահանգները ՄԱԿ-ի Անվտանգության խորհրդում օգտագործել է վետոյի իր իրավունքը և արգելափակել է Ալժիրի բանաձևը, որով առաջարկվում էր Պաղեստինը դարձնել համաշխարհային կազմակերպության լիիրավ անդամ:
Անվտանգության խորհրդի 12 անդամներ, այդ թվում՝ Ռուսաստանը և Չինաստանը, կողմ են քվեարկել Պաղեստինին ՄԱԿ-ում որպես կազմակերպության լիիրավ անդամ ընդունելու փաստաթղթին։ Շվեյցարիան և Մեծ Բրիտանիան ձեռնպահ են մնացել։