ԵՄ-ն հայտնել է, որ չի պատրաստվում որևէ երկրի վրա հարձակվել
2 րոպեի ընթերցում
![ԵՄ-ն հայտնել է, որ չի պատրաստվում որևէ երկրի վրա հարձակվել](http://armenpress.am/resized/480/static/news/b/2024/04/1133855.jpg)
ԵՐԵՎԱՆ, 2 ԱՊՐԻԼԻ, ԱՐՄԵՆՊՐԵՍ։ Եվրամիությունը նախազգուշական միջոցներ է ձեռնարկում հնարավոր սպառնալիքներին ավելի լավ պատրաստվելու համար, բայց չի պատրաստվում հարձակվել որևէ երկրի վրա, քանի որ ագրեսիվ միություն չէ։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է ԵՄ արտաքին քաղաքականության խոսնակ Պիտեր Ստանոն՝ մեկնաբանելով Բելառուսի նախագահ Ալեքսանդրի խոսքերը։
Ավելի վաղ Լուկաշենկոն ասել էր, որ Բելառուսը պատրաստվում է պատերազմի, սակայն Մինսկը չի ցանկանում կռվել։ Նրա խոսքով՝ երկրում անցկացվում է համապատասխան ստորաբաժանումների անհրաժեշտ ուսուցում, զորքերին մատակարարվում է տարբեր տեսակի զենքեր ու տեխնիկա։ Բելառուսի նախագահը նշել էր, որ Մինսկը ոչ մեկին չի սպառնում։
«Մենք որևէ մեկին սպառնալու կարիք չունենք, մենք ուրիշի հողը չենք ուզում»,- հայտարարել էր Բելառուսի ղեկավարը։
«ԵՄ-ն վտանգ է ներկայացնում միայն այն երկրների համար, որոնք խախտում են իրենց քաղաքացիների իրավունքները, մարդու հիմնարար իրավունքները, ժողովրդավարությունը և կոպտորեն խախտում են միջազգային իրավունքի նորմերը: ԵՄ-ն ագրեսիվ միություն չէ, ոչ ոք չպետք է վախենա Եվրամիությունից, բացի նրանցից, ովքեր խախտում են միջազգային իրավունքը... ԵՄ-ն նախազգուշական միջոցներ է ձեռնարկում։ Ուկրաինայի դեմ Ռուսաստանի ագրեսիայից հետո մենք ԵՄ-ին ավելի լավ ենք պատրաստում ցանկացած սպառնալիքի»,- ասել է Ստանոն: