2 րոպեի ընթերցում
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Ուկրաինա զորքեր ուղարկելու Ֆրանսիայի նախագահ Էմանուել Մակրոնի նախաձեռնությունը լավ պատրաստված չէր, և ՆԱՏՕ-ն պատրաստ չէ դրան։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտարարել է Լատվիայի վարչապետ Էվիկա Սիլինան։
«Չեմ կարծում, որ այդ նախաձեռնությունն այնքան էլ լավ պատրաստված էր, քանի որ դրա շուրջ քննարկումը դեռ չի հասունացել։ Խոսելով զորքեր ուղարկելու մասին՝ կարծում եմ, որ մենք ՆԱՏՕ-ում պատրաստ չենք դա անել», - ասել է Սիլինյան Գերմանիայի կանցլեր Օլաֆ Շոլցի հետ Բեռլինում կայացան համատեղ մամլո ասուլիսի ժամանակ։
Բացի այդ, նա ընդգծել է, որ Ուկրաինան ինքը չի խնդրել ՆԱՏՕ-ի երկրներին զորքեր ուղարկել՝ հավելելով, որ կարիք չկա կենտրոնանալ այն բանի վրա, ինչը չի խնդրում Կիևը։
Մակրոնը փետրվարին հայտնել էր, որ ԵՄ-ն համաձայնել է ստեղծել խորը հարվածների իններորդ կոալիցիա՝ Ուկրաինային մատակարարելով միջին և երկար հեռահարության հրթիռներ: Նա նաև ասել էր, որ Ֆրանսիան ամեն ինչ կանի, որպեսզի Ռուսաստանը չհաղթի պատերազմում։ Նրա խոսքով՝ արևմտյան երկրների ղեկավարները քննարկել են Ուկրաինա զորքեր ուղարկելու հնարավորությունը, ու թեև կոնսենսուս դեռ ձեռք չի բերվել, բայց ոչինչ բացառել չի կարելի։