Մոսկվայի առևտրի կենտրոններից մեկում ականապատման մասին ահազանգից հետո իրականացվել է մարդկանց տարհանում

ԵՐԵՎԱՆ, 25 ՄԱՐՏԻ, ԱՐՄԵՆՊՐԵՍ: Մոսկվայի հարավ-արևելքում գտնվող «Մոզաիկա» առևտրաժամանցային կենտրոնի այցելուներին ու անձնակազմին տարհանել են ականապատման մասին սպառնալիքի պատճառով: «Արմենպրես»-ի փոխանցմամբ՝ այդ մասին «ՌԻԱ Նովոստի» գործակալությանը հայտնել է ՌԴ մայրաքաղաքի արտակարգ իրավիճակների ծառայության ներկայացուցիչը:

«Անանուն զանգ՝ պայթյունի սպառնալիքով «Մոզաիկա» առևտրաժամանցային կենտրոնում՝ 7-րդ Կոժուխովսկայա փողոց, 9-րդ շենք հասցեում», - ասել է գործակալության զրուցակիցը։

Նրա խոսքով՝ ուժայինների կողմից ստուգման ժամանակ շենքից դուրս են բերվել բոլոր այցելուներն ու անձնակազմը։

Ռուսաստանի տարբեր քաղաքներում ականապատման մասին կեղծ լուրերի տարածումը շարունակվում է 2019 թ. վերջից։ Դրանք վերաբերել են դատարաններին, առևտրի կենտրոններին, մետրոյի կայարաններին, ավիացիոն և երկաթուղային ենթակառուցվածքներին, դպրոցներին, բժշկական հաստատություններին: Պայթյունների մասին սպառնալիքները երբեք չեն հաստատվել, սակայն օրենքով յուրաքանչյուր նման հաղորդագրություն պետք է ստուգվի: