ԻՊԲ-ն հայտնել է Գազայի հիվանդանոցի տարածքում ՀԱՄԱՍ-ի 140 անդամի ոչնչացման և խոշոր գումարի հայտնաբերման մասին
2 րոպեի ընթերցում
![ԻՊԲ-ն հայտնել է Գազայի հիվանդանոցի տարածքում ՀԱՄԱՍ-ի 140 անդամի ոչնչացման և խոշոր գումարի հայտնաբերման մասին](http://armenpress.am/resized/480/static/news/b/2024/03/1132922.jpg)
ԵՐԵՎԱՆ, 21 ՄԱՐՏԻ, ԱՐՄԵՆՊՐԵՍ: Իսրայելի պաշտպանության բանակի (ԻՊԲ) ստորաբաժանումները Գազա քաղաքի «Աշ Շիֆա» հիվանդանոցում շարունակվող գործողության ընթացքում ոչնչացրել են պաղեստինյան ՀԱՄԱՍ արմատական խմբավորման մոտավորապես 140 անդամի: «Արմենպրես»-ի փոխանցմամբ՝ այս մասին ԻՊԲ-ն հայտնել է իր Telegram ալիքում:
«Վերջին մեկ օրվա ընթացքում ավելի քան 50 ահաբեկիչներ են ոչնչացվել փոխհրաձգության ժամանակ, հայտնաբերվել են ահաբեկիչների ենթակառուցվածք և զենքի պահեստներ։ Գործողության սկզբից հիվանդանոցի տարածքում ոչնչացվել է ավելի քան 140 ահաբեկիչ», - նշված է ԻՊԲ-ի հայտարարությունում։
Իսկ X սոցիալական հարթակի իր էջում ԻՊԲ-ն գրել է, որ «Աշ Շիֆա» հիվանդանոցում խուզարկություններ անցկացնելիս նաև հայտնաբերել է խոշոր գումար` դոլարով և հորդանանյան դինարով, որը համարժեք է 11 միլիոն շեկելի (շուրջ 3 միլիոն դոլար):
צוות הקרב של חטיבה 401 יחד עם שייטת 13, לוחמי יחידת דובדבן וכוחות שב״כ בפיקוד אוגדה 162 ממשיכים בפשיטה בבית החולים שיפאא׳. במסגרת הסריקות בבית החולים הכוחות איתרו 11 מיליון שקלים בדולרים ודינר ירדני אשר יועדו לטרור >> pic.twitter.com/ZYox2zFiiK
— צבא ההגנה לישראל (@idfonline) March 20, 2024
Իսրայելի պաշտպանության բանակը «Աշ Շիֆա» հիվանդանոցում գործողություն է սկսել այն բանից հետո, երբ հետախուզությունը տվյալներ է ստացել, թե ՀԱՄԱՍ-ի մարտիկները հարձակումներ են նախապատրաստում հիվանդանոցային համալիրի տարածքից: ԻՊԲ-ում նշել են, որ զինվորներին հոսպիտալ ուղարկելուց առաջ հրամանատարությունը նրանց հրահանգել է չվնասել բուժառուներին, բժիշկներին, քաղաքացիական անձանց և բժշկական սարքավորումները։