ՌԴ-ում ընտրությունների ժամանակ խոցվել է 419 ԱԹՍ և 67 հրթիռային արկ. Շոյգու
1 րոպեի ընթերցում
![ՌԴ-ում ընտրությունների ժամանակ խոցվել է 419 ԱԹՍ և 67 հրթիռային արկ. Շոյգու](http://armenpress.am/resized/480/static/news/b/2024/03/1132838.jpg)
ԵՐԵՎԱՆ, 20 ՄԱՐՏԻ, ԱՐՄԵՆՊՐԵՍ: Ռուսաստանի նախագահի ընտրությունների անցկացման ժամանակ ոչնչացվել է ուկրաինական 419 անօդաչու թռչող սարք և 67 հրթիռային արկ: Ինչպես «Արմենպրես»-ը տեղեկանում է «Ինտերֆաքս» գործակալությունից, այդ մասին հայտարարել է ՌԴ պաշտպանության նախարար Սերգեյ Շոյգուն։
«Ընտրական միջոցառումների ժամանակ խոցվել է 419 անօդաչու թռչող սարք և 67 հրթիռային արկ», - ասել է Շոյգուն մարտի 20-ին կայացած գերատեսչության կոլեգիայի նիստում։
Նրա խոսքով՝ Ուկրաինան փորձել է խափանել ընտրական միջոցառումները՝ թիրախավորված գնդակոծություններ կատարելով քվեարկության վայրերի վրա։
«Ահաբեկչական գործողությունները կանխելու համար ռուսական զորքերն ուժեղացրել են կառավարական և սոցիալական օբյեկտների պահպանությունը և ամրապնդել հակաօդային պաշտպանության համակարգը», - ասել է ՌԴ պաշտպանության նախարարը։
Ռուսաստանում նախագահական ընտրությունները կայացել են մարտի 15-17-ը, որոնց արդյունքներով հաղթել է նախագահ Վլադիմիր Պուտինը՝ ստանալով ձայների 87 %-ը։