ԱՄՆ-ն և Ճապոնիան տիեզերքում միջուկային զենքի արգելքի վերաբերյալՄԱԿ-ի ԱԽ բանաձևի նախագիծ են պատրաստել
1 րոպեի ընթերցում
ԵՐԵՎԱՆ, 18 ՄԱՐՏԻ, ԱՐՄԵՆՊՐԵՍ: Վաշինգտոնն ու Տոկիոն պատրաստել են տիեզերքում միջուկային զենքի տեղակայման արգելքը հաստատող՝ ՄԱԿ Անվտանգության խորհրդի բանաձևի նախագիծ։
«Արմենպրես»-ի հաղորդմամբ՝ ինչպես փոխանցում է ՏԱՍՍ-ը, այս մասին հայտարարել է ՄԱԿ-ում ԱՄՆ մշտական ներկայացուցիչ Լինդա Թոմաս-Գրինֆիլդը՝ ՄԱԿ Անվտանգության խորհրդում «Միջուկային զինաթափումը և միջուկային զենքի չտարածումը» թեմայով բաց քննարկմանը։
«Միջուկային զենքի ցանկացած տեղակայում Երկրի ուղեծրում աննախադեպ, վտանգավոր և անընդունելի կլինի: Երկրները պետք է հավատարիմ մնան Տիեզերքի մասին պայմանագրի չորրորդ հոդվածով նախատեսված իրենց պարտավորություններին (արգելում է Երկրի ուղեծրում տեղադրել զանգվածային ոչնչացման, այդ թվում՝ միջուկային զենք ունեցող օբյեկտներ) և մենք բոլոր երկրներին, որոնք դեռ չեն միացել այս պայմանագրին, կոչ ենք անում անհապաղ անել դա»,-ասել է Գրինֆիլդը՝ հավելելով, որ Ճապոնիայի և Միացյալ Նահանգների համատեղ նախագիծը վերահաստատում է այս պայմանագրի կողմերի հիմնարար պարտավորությունները և կոչ է անում անդամ երկրներին չմշակել միջուկային զենք կամ զանգվածային ոչնչացման որևէ այլ զենք, որը նախատեսվում է Երկրի շուրջը տեղադրելու համար։