2 րոպեի ընթերցում
ԵՐԵՎԱՆ, 18 ՄԱՐՏԻ, ԱՐՄԵՆՊՐԵՍ: ՌԴ Բելգորոդի մարզի ղեկավար Վյաչեսլավ Գլադկովը հայտնել է ուկրաինական կողմից Բելգորոդի շրջանի տարածքի գրոհի մասին։ «Արմենպրես»-ի փոխանցմամբ՝ այս մասին իր Telegram ալիքում հայտնել է Բելգորոդի նահանգապետ Վյաչեսլավ Գլադկովը։
«Բելգորոդի շրջանում Ուկրաինայի զինված ուժերի կողմից օդային գրոհը հակաօդային պաշտպանության միջոցներով հետ մղելուց հետո, ըստ նախնական տեղեկությունների, Նիկոլսկոյե գյուղում երկու մարդ է զոհվել, չորսը տուժել են», - գրել է Գլադկովը։
Ըստ նրա տեղեկությունների՝ մասնավոր բնակելի տանը հասցված ուղղակի հարվածի հետևանքով ստացած վերքերից զոհվել է 17-ամյա մի երիտասարդ և մեկ տղամարդ. նրանք տեղում մահացել են մինչև շտապօգնության ժամանումը։
«Մեր փրկարարներն այդ նույն տան փլատակներից դուրս են բերել մի փոքրիկ աղջկա, որը գանգուղեղային փակ վնասվածք և վերջույթների կոտրվածք էր ստացել: Շտապօգնության բրիգադը երեխային տեղափոխել է մարզային մանկական հիվանդանոց», - ասել է Գլադկովը։
Նա նշել է, որ օպերատիվ ծառայությունները շարունակում են փլվածքների մաքրումը, քանի որ տանը, ենթադրաբար, կարող են գտնվել ևս երկու կին։
«Եվս երեք տուժած տղամարդ հրաժարվել են հոսպիտալացումից», - տեղեկացրել է նահանգապետը:
Ինչպես ավելի վաղ հայտնել էր «Արմենպրես»-ը, Բելգորոդի առողջապահության նախարարը հայտնել էր, որ ուկրաինական զորքերի գնդակոծության հետևանքով մարտի 12-ից մինչև 18-ն ընկած մեկ շաբաթվա ընթացքումմարզում 11 խաղաղ բնակիչ է զոհվել, 82-ը՝ վիրավորվել։