ԵՐԵՎԱՆ, 14 ՄԱՐՏ, ԱՐՄԵՆՊՐԵՍ։ Կալիֆորնիայի Իրվայն քաղաքում Հետաքննությունների դաշնային բյուրոյի (ՀԴԲ) ուսումնական հաստատությունում տեղի ունեցած պայթյունի հետևանքով 16 մարդ է վիրավորվել։ Այս մասին «Արմենպրես»-ը տեղեկանում է CBS News-ից։
Միջադեպը տեղի է ունեցել մարտի 13-ին՝ տեղի ժամանակով կեսօրից հետո։
«Պայթյունի ձայնային ալիքի պատճառով վիրավորներից տասներեքը տառապում են գլխապտույտով և ականջի ցավով․․․․ Տուժածներից երկուսը վնասվածք են ստացել ոտքի շրջանում, նրանցից մեկին վիրահատական միջամտություն է հարկավոր եղել։ Եվս մեկ տուժած վնասվածք է ստացել մեջքի շրջանում, սակայն վիրահատության կարիք չի լինի», - հայտնել են Օրինջ շրջանի շերիֆի վարչությունից։
Շերիֆի ներկայացուցչի խոսքով ՝ միջադեպը տեղի է ունեցել սակրավորների և հատուկ նշանակության ուժերի համատեղ վարժանքների ժամանակ, բայց պայթյունի պատճառը մնում է անհայտ։
ՀԴԲ-ն այժմ հետաքննում է միջադեպը։