2 րոպեի ընթերցում
ԵՐԵՎԱՆ, 12 ՄԱՐՏԻ, ԱՐՄԵՆՊՐԵՍ: Հայիթիի մայրաքաղաք Պորտ-օ-Պրենսում բախումներն ավելի կատաղի են դարձել: Ծանր զինատեսակներով զինված ավազակները հարձակվել են Ազգային պալատի վրա (նախագահական նստավայր) և հրկիզել Ներքին գործերի նախարարության շենքի մի մասը։ Այդ մասին տեղեկացնում է «Արմենպրես»-ը՝ վկայակոչելով «BBC»-ին։
Մինչ այդ, միջազգային օդանավակայանը ենթարկվել է շարունակական հարձակումների։ Կառույցի աշխատանքը կասեցված է, որը չի կարողանում ընդունել վարչապետ Արիել Անրիի ինքնաթիռը:
Անցյալ շաբաթ կառավարության ղեկավարը փորձել է տուն վերադառնալ, սակայն նրա ինքնաթիռին թույլ չեն տվել վայրէջք կատարել; Վարչապետը չի կարողացել վայրէջք կատարել նաև հարևան Դոմինիկյան Հանրապետությունում։ Արդյունքում, Անրին ստիպված է մնալ Պուերտո Ռիկոյում և չի կարող մտնել այն երկիրը, որի գործող ղեկավարն է:
Նրանց թվում, ում այնուամենայնիվ հաջողվել է ներթափանցել անհանգիստ պետության տարածք, եղել է ԱՄՆ-ի զինվորականների խումբը։
Պետդեպարտամենտի խնդրանքը ստանալուց հետո Պենտագոնը հայտարարել է, որ գործողություն է իրականացնում Հայիթիում՝ Պորտ-օ-Պրենսում ԱՄՆ-ի դեսպանատան անվտանգությունն ուժեղացնելու և անձնակազմի տարհանումը կազմակերպելու համար:
ԵՄ-ն նույնպես հայտարարել է, որ կտարհանի իր բոլոր դիվանագետներին Հայիթիից բռնությունների աճի և 2010 թվականի ավերիչ երկրաշարժից հետո ամենասարսափելի հումանիտար ճգնաժամի պայմաններում:
Այնուամենայնիվ, միլիոնավոր հաիթիացիներ չեն կարող որևէ տեղ տարհանվել: Նրանք ստիպված են մնալ երկրում, որքան էլ իրավիճակը վատթարանա: