ԵՄ-ին անդամակցելու ՀՀ մտադրության վերաբերյալ Միրզոյանի հայտարարությունը լայն արձագանք է գտել միջազգային մամուլում

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Միջազգային մամուլում լայն արձագանք է գտել ՀՀ արտաքին գործերի նախարար Արարատ Միրզոյանի հարցազրույցը թուրքական TRT World հեռուստաընկերությանը, որում նա, ի թիվս այլ հարցերի, անդրադարձել է Հայաստանի՝ Եվրամիությանն անդամակցելու գաղափարի քննարկումներին:

«Արմենպրես»-ի հաղորդմամբ՝ Reuters-ը, մեջբերելով Արարատ Միրզոյանի խոսքը, նշել է, որ Հայաստանը դիտարկում է Եվրամիությանն անդամակցության հայտ ներկայացնելու հարցը, քանի որ ձգտում է ավելի սերտ կապեր հաստատել Արևմուտքի հետ։

«Այսօր Հայաստանում մեծ մասամբ քննարկվում են բազմաթիվ նոր հնարավորություններ, և գաղտնիք չի լինի, եթե ասեմ, որ դա ներառում է անդամակցությունը Եվրամիությանը»,- մեջբերել է լրատվամիջոցը։

Հարցազրույցի՝ Եվրամիությանն անդամակցելու հեռանկարի վերաբերյալ ՀՀ ԱԳ նախարարի խոսքի հատվածին անդրադարձել են նաև Politiko-ն և հնդկական The Times of India-ն, «Սպուտնիկ»-ի թուրքական ծառայությունը, իրանական Press TV-ն:

Միջազգային լրատվամիջոցները նշել են ՀՀ արտգործնախարարի արտահայտած համոզմունքը, որ առևտուրն այն ոլորտներից մեկն է, որի ուղղությամբ Երևանը հնարավոր է համարում հարաբերությունների հետագա խորացումը ԵՄ-ի հետ:

Ավելի վաղ Միրզոյանը հայտարարել էր, որ եկել է Հայաստանի և ԵՄ-ի միջև վիզաների ազատականացման հարցերի շուրջ երկխոսություն սկսելու ժամանակը, և նշել, որ Երևանը մտադիր է ԵՄ-ի հետ հարաբերությունները զարգացնել նաև այլ ուղղություններով։