Գերմանիան կմիանա Գազայի համար ծովային մարդասիրական միջանցքին
1 րոպեի ընթերցում
![Գերմանիան կմիանա Գազայի համար ծովային մարդասիրական միջանցքին](http://armenpress.am/resized/480/static/news/b/2024/03/1132069.jpg)
ԵՐԵՎԱՆ, 9 ՄԱՐՏԻ, ԱՐՄԵՆՊՐԵՍ: Գերմանիան կմասնակցի նոր ծովային միջանցքով Գազայի հատված մարդասիրական օգնության մատակարարմանը։
Ինչպես հաղորդում է «Արմենպրես»-ը, վկայակոչելով «ՏԱՍՍ»-ը, այս մասին հայտնում է «Der Spiegel»-ը՝ հղում անելով իր աղբյուրներին:
Ամսագրի տեղեկություններով՝ գերմանական կողմն այժմ իր գործողությունները համաձայնեցնում է միջազգային գործընկերների հետ։ Հարցի շուրջ բանակցությունները Գերմանիայի, Արաբական Միացյալ Էմիրությունների և այլ երկրների միջև ընթանում են Կիպրոսում:
Ամսագիրը նաև գրում է, որ Գերմանիայի զինված ուժերն ուսումնասիրում են ծովային միջանցք ստեղծելու հարցում աջակցություն ցուցաբերելու հնարավորությունը, եթե դաշնակիցներից համապատասխան հարցում ստացվի։
Գերմանիայի կառավարությունը կուլիսներում քննարկում է նաև Գազայի հատված օդային ճանապարհով մարդասիրական օգնություն տրամադրելու հարցը։ Այդ դեպքում քաղաքացիական բնակչության համար առաջին անհրաժեշտության պարագաները կհասցնեն հասցեատերերին՝ դրանք ցած նետելով ռազմաօդային ուժերի ինքնաթիռներից: