Պատգամավորները ֆրանսիացի դիվանագետների հետ քննարկել են ընտանեկան բռնությանն առնչվող օրենսդրական փաթեթին առնչվող հարցեր

ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ։ ՀՀ ԱԺ «Քաղաքացիական պայմանագիր» խմբակցության պատգամավոր Զարուհի Բաթոյանը փետրվարի 16-ին հանդիպել է Հայաստանում Ֆրանսիայի դեսպանության դիվանագետներ Ժյուլիետ Մալանդենի և Մարի Լորժուի հետ: Հանդիպմանը մասնակցել են նաև պատգամավորներ Սոնա Ղազարյանը և Ծովինար Վարդանյանը:

Ինչպես «Արմենպրես»-ին տեղեկացրին ՀՀ Ազգային ժողովից, Զարուհի Բաթոյանը դիվանագետներին է ներկայացրել վերջերս Ազգային ժողովի կողմից առաջին ընթերցմամբ ընդունված, իր և գործընկերների հեղինակած «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» ու կից օրենքներում ու մի շարք օրենսգրքերում փոփոխություններ և լրացումներ նախատեսող օրենսդրական փաթեթի մշակման նախապատմությունը, հիմնական փոփոխությունները:

Դիվանագետները հետաքրքրվել են նաև 2017 թվականին ընդունված օրենքի կիրարկման արդյունքներով, ինչպես նաև դրանից կատարած հետևություններով:

Ըստ աղբյուրի՝ օրենսդրական փաթեթի համահեղինակ Ծովինար Վարդանյանը, խոսելով նախագծի դրական կողմերի մասին, հատկապես առանձնացրել է ընտանեկան բռնության վերաբերյալ իրազեկման կարևորությունը և մշակութային փոփոխությունները` ընդգծելով, որ երբեմն ոչ զոհը, ոչ էլ բռնություն գործադրողը տեղյակ չեն, որ կատարվողն ընտանեկան բռնություն է: Ըստ Ծովինար Վարդանյանի` իրազեկումն այս օրենսդրական նախաձեռնության կարևորագույն փուլն է:

Նախաձեռնության համահեղինակ Սոնա Ղազարյանը կարևոր է համարել Ֆրանսիայի հետ փորձի փոխանակումը, նաև հասկանալու համար, թե ինչպիսի խնդիրների է Ֆրանսիան հանդիպել օրենքի կիրարկման ընթացքում:

Նշվում է, որ հյուրերն իրենց պատրաստակամությունն են հայտնել աջակցելու ոլորտային բարեփոխումներին, հատկապես` հանրային իրազեկության բարձրացմանն ուղղված միջոցառումներին: