Շվեյցարիայում ոչնչացրել են 15 պատանդ վերցրած տղամարդուն
1 րոպեի ընթերցում
![Շվեյցարիայում ոչնչացրել են 15 պատանդ վերցրած տղամարդուն](http://armenpress.am/resized/480/static/news/b/2024/02/1129946.jpg)
ԵՐԵՎԱՆ: 9 ՓԵՏՐՎԱՐԻ: ԱՐՄԵՆՊՐԵՍ։ Շվեյցարական իշխանությունները հայտնում են, որ ոստիկանության գործողությունների արդյունքում հաջողվել է վերացնել գնացքում 15 հոգու պատանդ վերցրած տղամարդուն։ «Արմենպրես»-ի փոխանցմամբ՝ այս մասին գրում է Reuters-ը։
Միջադեպը տեղի է ունեցել Շվեյցարիայի Վաուդ կանտոնում՝ Ֆրանսիայի հետ սահմանի հարևանությամբ։
Գործակալության տարածած տեղեկության համաձայն՝ 32-ամյա իրանցի տղամարդը, որն ապաստան էր խնդրել Շվեյցարիայից, զինված է եղել կացնով և դանակով, պատանդներին ահաբեկման մեջ է պահել գրեթե 4 ժամ։ Ուղևորների կյանքը հնարավոր է եղել փրկել այն բանից հետո, երբ ոստիկանները ներխուժել են գնացք և մահացու վիրավորում հասցրել պատանդառուին։
«Բոլոր պատանդներն անվնաս ազատ են արձակվել», - նշվում է կանտոնի ոստիկանության հայտարարության մեջ։
Չարագործի հնարավոր շարժառիթների մասին ոչինչ չի հաղորդվում։