2 րոպեի ընթերցում
ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: Ռուսաստանի քննչական կոմիտեն հետաքննում է Թաիլանդից Ռուսաստան թռչող ինքնաթիռի կործանումն Աֆղանստանում, որի հետևանքով 2 մարդ անհետ կորած է, իսկ 4 հոգու հաջողվել է փրկվել։ Այս մասին հաղորդում է «Արմենպրես»-ը՝ վկայակոչելով 1TV պարբերականի հրապարակումը։
Ըստ հրապարակման՝ դա եղել է սանիտարական ինքնաթիռ, որում գտնվել է 6 մարդ։ Ինքնաթիռը Մոսկվա էր տեղափոխում Վոլգոդոնսկի բնակչուհուն, որի առողջական վիճակը վատթարացել էր Թաիլանդում ամուսնու և տղայի հետ հանգստանալիս։ Կնոջը հոսպիտալացրել էին, սակայն որոշում էր կայացվել նրան վերադարձնել հայրենիք։
Falcon-10-ը ճանապարհին իջել էր Հնդկաստանում՝ վերալիցքավորման, սակայն Աֆղանստանի երկնքում կորել էր ռադարներից։
Իր հերթին ՏԱՍՍ-ը հաղորդում է, որ «Թալիբան» արմատական շարժման կողմից ստեղծված ռազմաօդային ուժերն ավարտել են որոնողափրկարարական աշխատանքները Բադախշանի նահանգի հյուսիսում Falcon 10 ինքնաթիռի կործանման վայրում։ Վթարը տեղի է ունեցել հեռավոր լեռնային տեղանքում, որոնողափրկարարական գործողությունը բարդացրել են ձյունը և զրոյից ցածր ջերմաստիճանը:
Թալիբների Տրանսպորտի և ավիացիայի նախարարության ներկայացուցչի խոսքով՝ ինքնաթիռի երթուղին նախօրոք պլանավորված չի եղել Աֆղանստանի օդային տարածությունում, ընթացքի ուղղությունից շեղումը տեղի է ունեցել թռիչքի ժամանակ տեխնիկական խնդիրների պատճառով։