Հունաստանի վարչապետի նստավայրում հրդեհ է բռնկվել
1 րոպեի ընթերցում
![Հունաստանի վարչապետի նստավայրում հրդեհ է բռնկվել](http://armenpress.am/resized/480/static/news/b/2024/01/1128487.jpg)
ԵՐԵՎԱՆ, 20 ՀՈՒՆՎԱՐԻ, ԱՐՄԵՆՊՐԵՍ: Հունաստանի վարչապետի նստավայրում՝ «Մաքսիմա» պալատում հրդեհ է բռնկվել, որն արագ մարվել է, վնասը զգալի չէ։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է Հունաստանի կլիմայական ճգնաժամի և քաղաքացիական պաշտպանության նախարարությունը։
«Առավոտյան հրդեհ է բռնկվել վարչապետի նստավայրի առաջին հարկում գտնվող հարակից պահեստում, հրդեհի մարման աշխատանքներին մասնակցել է 24 հրշեջ։ Հրդեհն արագ տեղայնացվել է՝ պատճառելով միայն թեթև նյութական վնաս»,- ասված է նախարարության հաղորդագրության մեջ։
Դեպքը հետաքննվում է իրավասու քննչական բաժնում։
Հունաստանի վարչապետի նստավայրը գտնվում է Աթենքի հենց կենտրոնում՝ Հիրոդու Ատիկիս փողոցում։ Դրանից ոչ հեռու գործում է հրշեջ կայան։