Բլինքենը և Պաղեստինի ղեկավարը քննարկել են Գազայում քաղաքացիական զոհերի նվազեցմանն ուղղված ջանքերը
2 րոպեի ընթերցում
ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ։ ԱՄՆ պետքարտուղար Էնթոնի Բլինքենը և Պաղեստինի ինքնավարության ղեկավար Մահմուդ Աբբասը հանդիպման ժամանակ քննարկել են Գազայի հատվածում քաղաքացիական զոհերի նվազեցմանն ուղղված ջանքերը:
«Արմենպրես»-ի հաղորդմամբ՝ այս մասին ասված է Պետդեպարտամենտի մամուլի ծառայության ղեկավար Մեթյու Միլլերի տարածած հայտարարության մեջ։
«Պետքարտուղար Բլինքենը քննարկել է Գազայում քաղաքացիական անձանց վնասները նվազագույնի հասցնելու ջանքերը և Գազայի տարածք հումանիտար օգնությունն արագացնելն ու ծավալներն ավելացնելը»,- Միլլերի խոսքերն է մեջբերում ՏԱՍՍ-ը։
Բլինքենը նաև նշել է Հորդանանի Արևմտյան ափին անկայունության աճը և քննարկել բռնության դեմ պայքարում ԱՄՆ ջանքերը: Հանդիպման ընթացքում նա շեշտել է Միացյալ Նահանգների դիրքորոշումը, որ Իսրայելի կողմից հավաքված բոլոր պաղեստինյան հարկային եկամուտները պետք է մնան պաղեստինյան իշխանությանը՝ համապատասխան ձևով նախկինում ձեռք բերված համաձայնագրերի համաձայն։
Ըստ Միլլերի՝ պետքարտուղարը Պաղեստինի ղեկավարի հետ զրուցել է վարչական բարեփոխումների մասին, որոնց իրագործումն օգուտ կբերի պաղեստինցիներին: Բլինքենը կրկին հավաստիացրել է , որ ԱՄՆ-ն աջակցում է խաղաղության և անվտանգության պայմաններում Իսրայելի և Պաղեստինի գոյակցությանը։