1 րոպեի ընթերցում
ԵՐԵՎԱՆ, 21 ԴԵԿՏԵՄԲԵՐԻ, ԱՐՄԵՆՊՐԵՍ: Ռուսաստանի Դաշնության դեսպան Օլեգ Մալգինովը դեկտեմբերի 21-ին կանչվել է Ուզբեկստանի արտաքին գործերի նախարարություն:
«Արմենպրես»-ի փոխանցմամբ՝ այս մասին տեղեկացնում են Ուզբեկստանի լրատվամիջոցները:
Ուզբեկստանի լրատվամիջոցները հայտնում են, որ դեսպանն ԱԳՆ է կանչվել ռուս գրող, «Արդար Ռուսաստան» կուսակցության անդամ Զախար Պրիլեպինի հայտարարությունից հետո։
Ռուսաստանի դեսպանին ասել են, որ նման հայտարարությունները չեն համապատասխանում Ուզբեկստանի և Ռուսաստանի Դաշնության միջև համապարփակ ռազմավարական գործընկերության ոգուն։
Մալգինովի խոսքով՝ Պրիլեպինի հայտարարությունները ընդհանուր ոչինչ չունեն Ռուսաստանի իշխանությունների պաշտոնական դիրքորոշման հետ, իսկ Ռուսաստանում Ուզբեկստանի ինքնիշխանությունը, անկախությունը և տարածքային ամբողջականությունը երբեք կասկածի տակ չեն դրել։ Դեսպանը նաև ասել է, որ Ռուսաստանի ԱԳՆ-ն շուտով կմեկնաբանի այս միջադեպը։
Պրիլեպինն ավելի վաղ առաջարկել էր Ուզբեկստանը և հարևան մյուս երկրները միացնել Ռուսաստանին։ Ըստ նրա՝ անհրաժեշտ է անվավեր ճանաչել ԽՍՀՄ փլուզման վերաբերյալ բոլոր փաստաթղթերը։