Բլինքենը դարձյալ ժամանել է Իսրայել՝ քննարկումների

ԵՐԵՎԱՆ, 16 ՀՈԿՏԵՄԲԵՐԻ, ԱՐՄԵՆՊՐԵՍ։ ԱՄՆ պետքարտուղար Էնթոնի Բլինքենը վերադարձել է Իսրայել՝ նախորդ այցից ընդամենը 4 օր անց։ Այս մասին հաղորդում է «Արմենպրես»-ը՝ վկայակոչելով BBC-ի հրապարակումը։

Ակնկալվում է, որ Բլինքենը Երուսաղեմում հանդիպումներ կունենա Իսրայելի ղեկավարության հետ Գազայում ռազմական գործողությունների շուրջ։

ԱՄՆ պետքարտուղարը Թել Ավիվ էր մեկնել հոկտեմբերի 12-ին՝ Վաշինգտոնի աջակցությունը հայտնելու Իսրայելին։ Այնուհետև Բլինքենը մեկնել էր արաբական 6 երկրներ՝ շարունակելու քննարկումները։

Նաև լուրեր են շրջանառվում, որ ԱՄՆ նախագահ Ջո Բայդենն առաջիկա օրերին կարող է Իսրայել այցելել՝ երկրի վարչապետ Բենյամին Նեթանյահուի հրավերից հետո։

Հոկտեմբերի 7-ին ՀԱՄԱՍ-ի ավելի քան 1500 զինյալներ ճեղքել էին անվտանգության պատնեշը և Գազայի հատվածից ներխուժել Իսրայել։ Իսրայելը պատերազմ է հայտարարել ՀԱՄԱՍ-ին և հարվածներ է հասցնում հարյուրավոր թիրախների։ Իսրայելը նաև Գազայի լիակատար պաշարում է սկսել՝ դադարեցնելով ջրի, էլեկտրաէներգիայի, վառելիքի, սննդի և այլ ապրանքների մուտքը։

Իսրայելում զոհերի թիվը գերազանցել է 1400-ը։ Պաղեստինյան կողմում զոհերի թիվը, ըստ Առողջապահության նախարարության, հասել է 2808-ի։ Նրանցից 2750-ը զոհվել է Գազայում, 58-ը՝ Հորդանան գետի արևմտյան ափին։ Երկու կողմերից վիրավորների թիվը 10 950 է, այդ թվում՝ 9700-ը՝ Գազայում։

Իսրայելի պաշտպանության բանակը հայտարարել է, որ Գազայում ՀԱՄԱՍ-ի կողմից գերի է պահվում 199 մարդ։