Լեռնային Ղարաբաղի վրա լայնամասշտաբ հարձակումից ի վեր Ադրբեջանի նախագահի կայքը զանգվածային կիբերհարձակման է ենթարկվել
1 րոպեի ընթերցում
ԵՐԵՎԱՆ, 21 ՍԵՊՏԵՄԲԵՐԻ, ԱՐՄԵՆՊՐԵՍ։ Ադրբեջանի նախագահի կայքը Լեռնային Ղարաբաղում լայնամասշտաբ հարձակման մեկնարկից ի վեր ենթարկվել է զանգվածային կիբերհարձակման։ Ինչպես «Արմենպրես»-ը տեղեկանում է ՏԱՍՍ գործակալությունից, այս մասին խոսել է Ադրբեջանի կապի և տեղեկատվական անվտանգության պետական հատուկ ծառայության ղեկավար Թուրալ Մամեդովը «Կիբերանվտանգության միջազգային օրեր» համաժողովում։
Նա նշել է, որ բազմաթիվ կիբերհարձակումներ են արձանագրվել Ադրբեջանի պետական հաստատությունների ինտերնետ-ռեսուրսների վրա։
«Միայն 4 միլիոն DDoS հարձակում է գրանցվել նախագահի պաշտոնական կայքի վրա», - ասել է Մամեդովը։
Պաշտոնյան հայտարարել է, որ կիբերհարձակումներն իրականացվել են բազմաթիվ կեղծ ստեղծված դոմեններից։