Ադրբեջանի հարձակումները Լեռնային Ղարաբաղում մեծացնում են հայ բնակչության նկատմամբ էթնիկ զտումների վտանգը․ Freedom House
2 րոպեի ընթերցում
ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ։ Freedom House իրավապաշտպան կազմակերպությունը խստորեն դատապարտել է Ադրբեջանի հարձակումը Լեռնային Ղարաբաղի ժողովրդի դեմ՝ ընդգծելով, որ տարածաշրջանի դեմոգրաֆիկ պատկերի փոփոխման ցանկացած փորձ ապօրինի ու անընդունելի է։
«Մենք խստորեն դատապարտում ենք Ադրբեջանի կառավարության բռնի հարձակումները Լեռնային Ղարաբաղում՝ մեծացնելով տարածաշրջանի հայ բնակչության նկատմամբ էթնիկ զտումների վտանգը։ Տարածաշրջանի ժողովրդագրական պատկերը ստիպողաբար փոխելու ցանկացած փորձ անօրինական է և անընդունելի։
Մենք կոչ ենք անում միջազգային հանրությանը պաշտպանել Լեռնային Ղարաբաղի խաղաղ բնակչությանը, կանխել մարդկության դեմ հանցագործությունները տարածաշրջանում և պահանջել Ադրբեջանի կառավարությունից՝ լինել պատասխանատու տարածաշրջանի հայերի բարօրության համար»,-«Արմենպրես»-ի հաղորդմամբ՝ նշված է Freedom House-ի՝ «X»-ի (նախկին Թվիթեր) միկրոբլոգում, որտեղ իրավապաշտպան կազմակերպությունը նաև կիսվել է Politico-ի՝ Լեռնային Ղարաբաղի ժողովրդի դեմ Ադրբեջանի հարձակման վերաբերյալ հասցեական հոդվածով։
We strongly condemn the Azerbaijani govt’s violent attacks in Nagorno-Karabakh, heightening the risk of ethnic cleansing against the region’s Armenian population.
Any attempt to forcibly change the region's demographics is illegal & unacceptable. (1/2)https://t.co/LYgSoGNGOe
— Freedom House (@freedomhouse) September 19, 2023
Ադրբեջանի կողմից սեպտեմբերի 19-ին սկսած լայնածավալ ռազմական գործողությունների հետևանքով Արցախի «Հանրապետական բժշկական կենտրոն»-ում գտնվում է 80 վիրավոր, նախնական տվյալներով ՝15-ը քաղաքացիական անձիք են։ Արձանագրվել է մահվան 5 դեպք: Ադրբեջանը Լեռնային Ղարաբաղում կիրառում է հրետանային ու հրթիռային միջոցներ, հարվածային ԱԹՍ-ներ, մարտական ավիացիա։