388.06
Վահե Ղազարյանը մասնակցել է ԱՊՀ մասնակից պետությունների ներքին գործերի նախարարների խորհրդի նիստին
2 րոպեի ընթերցում
ԵՐԵՎԱՆ, 15 ՍԵՊՏԵՄԲԵՐԻ, ԱՐՄԵՆՊՐԵՍ։ Ղազախստանի Հանրապետության Թուրքեստան քաղաքում տեղի է ունեցել ԱՊՀ մասնակից պետությունների Ներքին գործերի նախարարների խորհրդի հերթական նիստը, որին մասնակցել է ՀՀ ներքին գործերի նախարար Վահե Ղազարյանի գլխավորած պատվիրակությունը:
Այս մասին հաղորդագրություն է տարածել Ներքին գործերի նախարարությունը։
Օրակարգում ԱՊՀ մասնակից պետությունների տարածքում անձանց միջպետական հետախուզման, ճանապարհային երթևեկության անվտանգության բարձրացման, Համացանցում թմրամիջոցների անօրինական շրջնառության հակազդման, կիբերհանցավորության դեմ պայքարի, երկաթուղային, ջրային և օդային տրանսպորտի օբյեկտներում հասարակական կարգի ապահովման և այլ հարցեր են եղել:
Նիստում ելույթ է ունեցել ՀՀ ՆԳ նախարար Վահե Ղազարյանը՝ անդրադառնալով Ներքին գործերի նախարարության կազմավորման ընթացքին, Պարեկային ծառայության կայացմանն ու քրեական ոստիկանության ստորաբաժանումների կազմավորմանը և բարեփոխումների շրջանակում իրականացվող այլ գործընթացների:
Վահե Ղազարյանը նիստի մասնակիցների ուշադրությունն է հրավիրել կիրեռհանցավորության աճի միտումներին ու Համացանցով թմրամիջոցների և հոգեմետ նյութերի տարածման խնդիրներին և ընդգծել, որ այդ ոլորտում պայքարի արդյունավետության բարձրացման համար ԱՊՀ մասնակից պետությունների իրավապահ մարմինների մշտական և անընդմեջ օպերատիվ կապին զուգահեռ անհրաժեշտ է միասնական միջոցներ ձեռնարկել և մշակել փոխհամաձայնեցված մոտեցումներ, մասնավորապես՝ ձևավորել ոլորտի մասնագիտացված ստորաբաժանումներ ԱՊՀ շրջանակում:
Քննարկված հարցերի վերաբերյալ կայացվել են կոնկրետ որոշումներ ու ստորագրվել համապատասխան փաստաթղթեր: ԱՊՀ մասնակից պետությունների Ներքին գործերի նախարարների խորհուրդը որոշում է կայացրել հաջորդ նիստն անցկացնել Բելառուսի Հանրապետության Մինսկ քաղաքում:
