Թրամփին մեղադրել են Ջորջիա նահանգում ընտրությունների արդյունքները տապալելու փորձի մեջ
2 րոպեի ընթերցում
![Թրամփին մեղադրել են Ջորջիա նահանգում ընտրությունների արդյունքները տապալելու փորձի մեջ](http://armenpress.am/resized/480/static/news/b/2023/08/1117396.jpg)
ԵՐԵՎԱՆ, 15 ՕԳՈՍՏՈՍԻ, ԱՐՄԵՆՊՐԵՍ: ԱՄՆ Ջորջիա նահանգում երկրի նախկին նախագահ Դոնալդ Թրամփին մեղադրել են 2020 թ.-ի ընտրությունների արդյունքները տապալելու փորձերի մեջ: Այս մասին հաղորդում է «Արմենպրես»-ը՝ վկայակոչելով BBC-ի հրապարակումը:
Թրամփի հետ միասին մեղադրանք է առաջադրվել ևս 18 հոգու, այդ թվում՝ նրա փաստաբաններին, ինչպես նաև Սպիտակ տան աշխատակազմի նախկին ղեկավարին: Մեղադրական փաստաթուղթը բաղկացած է 41 կետից, որոնք ներառում են կեղծ հայտարարություններ և գրություններ, կեղծիք, կեղծ փաստաթղթերի ներկայացում, վկաների վրա ներգործություն, դավադրություն պետությանը խաբելու նպատակով, գողություն և սուտ վկայություն և այլն:
Այս տարի Սպիտակ տան նախկին ղեկավարին քրեական մեղադրանք է առաջադրվում արդեն չորրորդ անգամ: Թրամփը հերքում է իր հանդեպ բոլոր մեղադրանքները:
Դոնալդ Թրամփն առաջադրել է իր թեկնածությունը Հանրապետական կուսակցությունից նախագահական ընտրարշվին մասնակցելու համար: Ըստ նախկին նախագահի՝ իր հանդեպ մեղադրանքները քաղաքական ենթատեքստ ունեն:
Ինչպես ավելի վաղ հայտնել էր «Արմենպրես»-ը, օգոստոսի սկզբին Թրամփին մեղադրանք է առաջադրվել 2020 թ.-ի նախագահական ընտրությունների արդյունքները չեղյալ հայտարարելու փորձի առնչությամբ: Իսկ սրան նախորդող մյուս երկու գործերի շրջանակներում Թրամփին մեղադրում են գաղտնի փաստաթղթերի հետ վարվելու կանոնների խախտման և պոռնո աստղ Սթորմի Դենիելսին լռեցնելու նպատակով նրան վճարելու և դրա պատճառով գործարար հաշվետվությունները կեղծելու մեջ։